2026-cı yılın Kirez ayın 18-dä tamamnandı 20 yıl, nicä anılmış opera zanaatçıykamız, Moldova Respublikasında “Maestru în Artă” (“İncäzanaatta Maestro”) Marina RADİŞ Kişinövdakı Mariya BİEŞU adına Opera hem Balet Teatrusunda, seftä sțenaya çıkıp, italiyalı kompozitorun Dşuzeppe VERDİnin (ital.: Giuseppe Fortunino Francesco Verdi) “Traviata” operasında Violeta Valerinin partiyasınnan opera zanaatçıykası yolunda debütunu yaptı.
Bu unudulmaz opera debütu için Marina RADİŞ bölä annadêr: “İrmi yıl geçti, ama bişey unudulmadı: o rolümnen bütünneşmeyi büünkü günädän duyêrım! Spektakldän iki saat öncä kendimi duymaz oldum. Sade soluumu hem sesimi duyardım. O avşam sţenada Marina yoktu – sade Violetta Valeri vardı. Kendimä geldin spektaklinin bitmesindän bir saattan sora.
Benim üüredicilerimin yaardımınnan, bän bilärdim ne yapmaa!
İvan Vasilyeviç KVASNYUKa çok şükür ederim, ani bana opera vokalının dünnesini açtı hem herzaman pek dikkatlı hem duyguluydu. Svetlana Georgievna POPOVAya, teatrunun dirijörkasına, muzıkaylan, frazirovkaylan, dinamikaylan hem muzıka aracılınnan duyguları göstermää deyni, pek çok bilgiyä borçluyum. Eleonora Konstantinovna KONSTANTINOVAya aktör ustalıı için temel bilgileri, opera zanaatının nüanslarını hem stil duygusunu üürettii için şükür ederim”.
Moldova Respublikasında “Maestru în Artă” (“İncäzanaatta Maestro”) Marina RADİŞ (bak burada) duudu Gagauziyanın Kazayak küüyündä 1982-ci yılın Küçük ayın (fevral) 2-dä. Başardı Kişinevdakı Muzıka Konservatoriyasını (şindiki Muzıka, teatr hem resimcilik incäzanaatları Akademiyası). 2005-ci yıldan beeri Moldova Opera hem balet Teatrusunda, solistka olarak, çalışêr hem burada çeşitli operalarda baş rollerin partiyalarını çalêr.
