Kirez ayında (iyül) U-12 kızçaazlar komandaları hem büüklerin arasında basketbolda Moldovada çempionatları geçti, neredä Gagauziyanın Çadır U-12 kızçaazlar komandası çempion oldu, büüklerdä dä “Ceadır-Basket” komandası bronzayı aldı.
Kirez ayın 10-13 günnerindä Rışkanı kasabasında 12 yaşınadan kızçaazların arasında basketbolda Moldova Respublikasının çempionatı geçti, neredä pay aldılar bütün memlekettän Belț, Çadır, Dondüşeni, Drokiya, Dubasar, Kauşan, Kişinev, Rışkan komandaları.
Elemä oyunnarında Kişinev, Dubasar hem Kauşan komandalarını enseyip, Çadırdan U-12 kızçaazlar komandası finala çıktı. Finalda da Rışkanı komandasını 59:37 tarayıp, çempion oldu.
Bütün komandaya, çempionatın en islää oyuncuykası ödülünü alan bu komandanın oyuncuykasına Viktoriya KİOROGLUya hem bu yolda komandayı başarıya getirän trenerlara Sergey hem Eduard KINÇEVlara kurluca olsun deeriz.
Kirez ayın 18-dä Kişinevda olan büüklerin arasında basketbolda Moldovada çempionatında bronza medali için oyuna Gagauziyadan iki komanda girdi – “Ceadır-Basket” (Çadır kasabası) hem “Comrat-Hores” (Komrat kasabası). Bu oyunu 67:59 enseyip, Gagauziyanın “Ceadır-Basket” komandası çempionatın bronza medalilerini aldı. Kutluca olsun!
