Canavar ayın (oktäbri) 23-dä Moldova güvennik hem informaţiya slujbasının (SİS) direktoru Alexandru MUSTEAȚA Gagauziyaya ansızdan gelip, Gagauz Yeri Başkannık komitetı hem Halk Topluşu binasına uuradı. Bundan sora Canabisi Komrattakı SİS bölümünä hem Gagauziya polițiya Upravleniyasına da gitti, bildirer moldovalı presa.
Nicä taa sora belli oldu, o saatlarda polițiya hem karabinerlar tarafından yıvın korunan Gagauz Yeri Başkannık komitetı hem Halk Topluşu binasında SİS direktoru Alexandru MUSTEAȚA buluşmuş Halk Topluşu Başı Dimitriy KONSTANTİNOVlan hem Gagauziyanın öndercilerinnän.
Bu buluşma hem orada ortaya koyulan fikirlär için Moldova güvennik hem informaţiya slujbasının (SİS) tarafından hem başka bir Moldovada kuvettä bukunan kuruluşu tarafından ofițial açıklama yok.
Ama ortaya sızdırılan bilgilerä görä, Alexandru MUSTEAȚA ilktän yarım saat kadar Halk Topluşu Başı Dimitriy KONSTANTİNOVlan neleri sä lafetmiş. Sora da, binanın üçüncü katına kalkıp, İspolkom azalarınnan söz tutmuş.
Şüpä var, ani bu buluşmalarda açıklandı Gagauziya öndercilerin Moldovada zapaya koyulan “ŞOR” partiyasının başı İlan ŞORlan ilişkileri hem onun kanadı altında bulunan politika partiyalarına zakon dışı yolunnan para akıdılması.
Diil lääzım pek akıllı olmaa annamaa deyni, ani bu buluşmakta Gagauziya Başkanın konusu hem Gagauziya (Gagauz Yeri) Avtonom-teritorial Bölgesinin gelecäännän ilgili soruşlar da ortaya koyuldu, bezbelli. Lafedilän soruşların arasında olmalı Gagauziya Halk Topluşuna eni seçimnär vardı hem Komrat-Kişinev dialogun enidän başladılaması için Halk Topluşun parlamentlar arası çalışmak grupasını masya oturtmak hem onun yolunnan lääzımnı kararlar aldırtmak konusu da.
Şüpeleniler, ani bu buluşmada Kişinev tarafından baskı altında bulunan Gagauziya Radio hem Televideniye (GRT) cümne Kompaniyasının dolayandakı durum da ortaya koyuldu. Herliim bu da öläsaydı, lääzım beklemää, ani GRTya baskı taa da pek aarlaşacêk.
Bu buluşmadan sora Moldova güvennik hem informaţiya slujbasının (SİS) direktoru Alexandru MUSTEAȚA kendisinin ansızdan bu gelişi için presaya hiç bir açıklama yapmaa istämedi.
PATRET: Komrat Moldova Radiosu.
