Ceviz ayında (sentäbri) Evropada, Moldovada hem Gagauziyada “Boris” adlı țıklonun getirdii çıvgın lüzgerlär esmesinnän hem gök gürültülü büük yaamurların erä döküdülmesinnän hem sel kıyametlerinnän üzlärcä milion evro zararlar getirildi. Bu zararların arasında can hem mal kayıpları oldu.
“Boris” adlı țıklon sade Moldovada yaklaşık 200 milion ley mal zararı getirdi. O zararların taa çoyu Leova (yaklaşık 90 milion ley), Kantemir (yaklaşık 40 milion ley) rayonnarında hem Kişinev munițipiyindä (yaklaşık 40 milion ley) oldu. Burada en çok infrastruktura obyektlarına zarar oldu, ilişti insannarın evlerinä hem çorbacılıklarına da. Zarar oldu Gagauziyada da. Sellär buudular evleri hem çiftçilik tarlalarını, bozdular yolları hem aldılar tıynakları hem köprüleri. Büük lüzgerlär kopardılar evlerin örtülerini. Büük yaamurlar beterinä Moldovada 13 küü şafksız kaldıydı hem R24-län R25 yolları kapandıydı.
Hepsi bu zararları ortadan kaldırmaa deyni, devletin İİM Üstolan durumnar genel inspekțiyası tarafından 204 kişi kaldırıldı hem 76 taanä tehnika erlerä çıkarıldı.
Bu zararlara karşı koymaa deyni Moldovada hava durumunnan ilgili Üstolan komisiya kuruldu.
Moldova pravitelsrvosunun açıklamasına görä, zarar görän rayonnara hem munițipiya devlet tarafından yardım verilecek.
Ceviz ayın (sentäbri) 15-16 için dä, gök gürültülü büük yaamurlar hem lüzgerlär sebepinä görä hem havanın denkli olmadıı üzerinä, bütün Moldovada Ceviz ayın (sentäbri) 15-dän saat 07:00-tan Ceviz ayın (sentäbri) 16 saat 05:00 beeri turuncu kod açıklandı.
