(Komrat A. Valykov adına uşak muzıka şkolasının 60-cı yıldönümü bakıldı)
Hederlez ayın 31-dä olan “60 yıl muzıka dünnäsında” yıldönümü konțert sırasınnan Komrat kasabasının A. Valykov adına uşak muzıka şkolası kutladı kendisinin 60-cı yıldönümünü.
Komrat kasabasının A. Valykov adına uşak muzıka şkolasının “60 yıl muzıka dünnäsında” yıldönümü sırası açıldı horun sțenadan bu üüredicilik kuruluşun “Komradın muzıka şkolası” gimnasının (laflar –Todur ZANET, muzıka –İliya FİLEV) çalmasınnan.
Sora şkolanın geçmişi hem büünkü yaşaması için annattı bu şkolanın şindiki direktoru Dimitriy TİMOFEY.
Kutlama sözünnän insannara danıştı Gagauziya kultura Upravleniyasının başı Marina SEMÖNOVA. Gagauziya kultura Upravleniyası adından Canabisi baaşladı şkolaya güçlendirän aparatura hem şkolanın zaametçilerinä Diplomalar verdi.
Yubilärın adına kutlama sözlerinnän danıştılar başka insannar da: Komrat primariyasından, Gagauziyanın başka uşak muzıka şkolalarından, muzıka üüredicileri, kolegaları. Hepsi onnar kendi baaşışlarını da baaşladılar.
Kutlamaların arasında Komrat kasabasının A. Valykov adına uşak muzıka şkolasının üürencileri, türlü muzıka uurlarında, kendi becermeklerini gözterdilär. Kimileri bir-iki nomerlän, kimileri sä uzun konțert gösterip.
Komrat kasabasının uşak muzıka şkolası kuruldu 1966-cı yılda da, 2017-ci yılın Çiçek ayın 1-dän Andrey Valykovun adını taşıyarak, 60 yılın içindä binnän uşaaa muzıka sevdasını haşladı hem onnarı muzıka ustası yaptı. Bu şkolada fortepiano, telli instrementleri, duhovoy hem halk muzıkası bölümneri işleer.
Büünkü gündä şkolada hem onun Avdarma, Baş küüyü (Kirsova), Dizginca, Ferapontyevka- Kongaz, Kongazçık, Svetloe küülerindä bulunan filiallarında 350 üürenciyi muzıka dünnesindän 56 muzıka üüredicisi geçirer.
