Kırım ayın (dekabri) 17-dä Komrat kasabasının Stepan TOPAL adını taşıyan “Masalcık” 9-cu uşak başçasında (9-cu EÜK), oldu “Seni severim, Tarafım!” adlı bir yortulu sıra, angısı baaşlandı Gagauziyanın kurulmasının 31-ci yıldönümünä, neredä, üüredici-terbiedicilär zaametlerinnän, hazırlanmak grupasından uşaklar gagauz dilindä hazırlanmakta pek büük başarılar gösterdilär.
Gagauziya Gimnasının çalmasından başlayan “Seni severim, Tarafım!” yortulu sırada, gagauz dilindä üürediciyka-terbiediciykası Lüdmila BARLADÄNın önderciliindä hem Canabisinä başka pedagogların yardımında, Komradın “Masalcık” 9-cü uşak başçasının uşakları gagauz dilindä peet annattılar hem sıranın o günkü musaafirin Todur ZANETin laflarına türkü çaldılar, “Kadınca” oyunu oynadılar, hem dä sonunda bir gagauz halk masalına insțenirovka gösterdilär.
Belliydi, ani uşaklar hepsi hazırlanmış yaratmaları candan-ürektän geçirärdilär. Onnarın türkülerindä, oyunnarında Gagauziyaya halizdän patriotika duyguları şılardı.
Açan sıra geldi Todur ZANETin uşaklar için hazırladıı “Gagauz masalları: masaldan masala” gagauz folklor kiyadından “Kül Pepeleşkası” gagauz halk masalına, salon halizdän bir büücülüklän doldu. Uşak başçasının terbiedicileri tarafından hazırlanan hem uşak uurunda koyulan bu masalı körpä artistlär ölä gözäl oynadılar, ani büüklär dä şaşardılar. Ama, açan bu masalın sonunda, sırada pay alan hepsi uşaklar masal kahramannarın bir düününü oynadılar – ortalık heptän patladı. Çünkü bu masallı düündä, düün muzıkasında hem düün oyununda dedelerimizdän gelän havalar vardı.
Bu sıranın pek islää gecirilmesindä omuzlarını koydular uşak başçanın hazırlanmak grupasının terbiediciykası Marina GAYDARCI, logoped-pedagog Elena DRAGNEVA (masalda “Boba” rolünu oynayan), terbiediciyka Anastasiya ALADOVA (masalda “Padişah” rolünu oynayan) hem muzıka zaametçiykaları Lüdmila MİTİOGLU hem dä Yaroslava TUKAN. Bundan kaarä uşak başçanın şindiki uşaklarına yardımcı oldular bıldır bu başçadan çıkan hem artık Komradın Stepan Kuroglu adına gimnaziyasında üürenän uşaklar, angılarını getirdi başlangıç klaslarda üürediciyka Anastasiya Konstantinovna LEYÇU hem onun kolegaları.
Saa olsunnar hepsi insannar, kim hazırladı Gagauziyanın kurulmasının 31-ci yıldönümünä adanmış bu gözäl “Seni severim, Tarafım!” sırasını hem baaşladı onu hem uşak başçasının uşaklarına, hem bütün gagauz milletindä, hem uşak başçasının o günkü musaafirlerinä.
Yortulu sırayı hazırlayan “Masalcık” 9-cu uşak başçasının gagauz dilindä üürediciyka-terbiediciykası Lüdmila BARLADÄN uşakların hem onnarın terbiedicilerin becerikleri için bölä söledi: “Biz uşak başçasında her zaman hazırlêêrız konțertlı programa. Onnarda türkü, oyun, masal aracılıınan uşaklarda ana dilimizä sevgi hem saygı yaradêrız. Uşaklar da bunnarı sevgiylän emerlär, kablederäk nicä kultura hem kendilik özellii”.
Uşak başçasının başı Anna Vasilyevna KROİTOR da gagauz dilindä yortulu sıranın özelliini bölä urguladı: “Ana dilini küçüktän lääzım üürenmää ana laflarınnan bilä hem sallangaç türküsünnän bilä. Pek sevinerim ona, ani Gagauziya verdi bizä kolaylık üürenmää gagauz dilini taa uşak başçalarından”.
Bu sırada bulunan Gagauziya üüredicilik Upravleniyasının baş zaametçiykası Lidiya OSTAŞ sıra için dedi: “Biz sevineriz ona, ani Gagauziyada var ölä üüredicilär, ani severlär gagauz dilini hem da bu sevgiyi uşaklarda da etiştirerlär. Biz dä, Gagauziyanın üüredicilik Upravleniyası olarak, yardımcı olêrız Gagauziyanın hepsi uşak başçalarına herbir uurda hem Gagauziyanın kuruluşuna adalalı sıralarda da”.
Bu yortulu sıranın şannı musaafiri oldu akademik, yazıcı hem poet Todur ZANET, angısı, baaşlayarak kendi kiyatlarını bu uşak başçasına, dedi: “Lääzım tanıyalım hem annayalım, ani kulturamızın, ruh zenniimizin, gagauz dilimizin korunması hem ilerlemesi, ana-boba yuvasından başlayıp, uşak başçasında temelleşer hem ilerleer. Bunda da büük katkılar var uşak başçaların zaametçilerindä, angıları, alıp uşakları ana-boba ellerindän, hamur gibi onnarı yuurup, hepsi bu zenniklerimizi korumakta hem ilerletmektä onnara yol açêrlar. Çünkü ana dilindä lafedän hem yaradan uşaklar milletimizin geleceenin en kaavi direkleridir. Bitki vakıt bizi, gagauzları, savaşêrlar bölmää, biri-birimizä sokmaa hem aramızda kavga yaratmaa, ama biz diil lääzım buna verilelim. Diil lääzım biri-birimizi iyelim. Çünkü geleceemiz sade birliktä! Lääzım aramızda birlik olsun. Da te bu uşaklarlan bilä, ani gagauz dilini ölä gözäl kavramışlar hem üürenmişär, Gagauziya Bayraanı yukarı kaldıralım! Gagauzluk Bayraanı üüseklerdä dalgalandıralım hem bu bayrakları gelecek hodullu evlatboyların kaavi ellerinä verelim, onnarı ileri taşısınnar deyni!”
Anna Vasilyevna KROİTOR, Komrat kasabasının 9-cu uşak başçanın başı
