2025-ci yılın Kasım ayın 12-14 günneri arası Türkiyenin Osmaniye Korkut Ata Universitetında yapıldı Halklararası “Dede Korkut/Korkut Ata” Simpoziumu, angısı “Korkut Atanın izindä: Dedä Korkut örüyüşü”nän başladı. Simpoziumun ana ortakları oldular TİKA (Türk İşbirlii hem Koordinaţiya Agenstvosu Başkannıı), TÜRKSOY (Halklararası Türk Kulturası Kuruluşu), Türk Dil Kurumu hem başkaları.
Bütün türk dünnesindän 80-nä yakın bilim insannarın katılmasınnan Simpoziumun açılışı başladı saygı duruşunnan hem Türkiye Respublikasının Gimnasının çalınmasınnan hem dä Simpoziuma yollanan TBMM İnsan Haklarını İncelemä Komisiyanın Başkanı Derya YANIK, TÜRKSOY Genel Sekretari Sultan RAEV hem MHP Genel Başkanı hem Osmaniye deputatı Dr. Devlet BAHÇELİ adından kutlama telegramaların okunmasınnan. Simpozium açılışında Osmaniye Valisi Dr. Erdinç YILMAZ da pay aldı.
“Dede Korkut/Korkut Ata” Simpoziumun açılış hem kutlama sözlerini tuttular: Osmaniye Korkut Ata Universitetın rektoru Prof. Dr. Turgay UZUN, Manas Universitetın rektoru Prof. Dr. Alpaslan CEYLAN, MHP Genel Başkan Başdanışmanı hem Ahmed Cevad İnstitutun Başkanı Prof. Dr. Ruhi ERSOY, Halklararsı Türk Akademiyası Başkanı Prof. Dr. Şahin MUSTAFAYEV, Atatürk Kultura, Dil hem İstoriya Üüsek kuruluş Başkanı Prof. Dr. Derya ÖRS hem Türk Dil Kurumu Başkanı Prof. Dr. Osman MERT. Bundan sora, programaya görä, Türk muzıka tertipleri sergisi siiredildi hem rektorluk binasının hayatında Korkut Ata byustun açılışı yapıldı.
Açılış sıraların ardına Simpoziumun “Dede Korkut’ta Yer Arayışları” (gagauzça: “Dedä Korkutta er aarayışları”), “Türk Dünyasında Kolektif Belleğin İzinde Dede Korkut’un Coğrafyaları” (“Türk dünnäsında toplu akılın izindä Dedä Korkutun erleri”), “Dede Korkut’ta İnanç, Ritüel ve Kutsal Düzenin Kurulumu” (“Dedä Korkutta inanç, adetli sıra hem ayozlık düzenin kuruluşu”), “Dede Korkut’un Anlatı Dünyası: Ozan, Töre ve Kahramanlık İmgesi” (“Dedä Korkutun annatmak dünnäsı: ozan, adet hem kahramannık biçimneri”), “Dede Korkut’un Müzik Dili: Göstergeden Kültürel Anlama” (“Dedä Korkutun muzıka dili: nışandan kulturalı annamaya”), “Dede Korkut’un Medeniyet Kurgusu: Halk Bilgisi, Sanat ve Bilim Arasında” (“Dedä Korkutun țivilizațiya kuruluşu: halk bilgisi, inzäzanaat hem bilim arasında”), “Dede Korkut Hikâyelerinde Yapı, Dil ve Anlam Katmanları” (“Dedä Korkut annatmalarında yapı, dil hem annamak katları”), “Dede Korkut ve Somut olmayan Kültürel Miras” (“Dedä Korkut hem mal olmayan kultura varlık”), “Alt Metin Olarak Dede Korkut: Yeniden Yazmalar, Uyarlamalar ev Karşılaştırmalar” (“Alt yazı olarak Dedä Korkut: enidän yazmalar, uyarlamalar hem karşılaştırmalar”), “Dede Korkut’un Mitolojik Katmanları ve Halk Kültürü” (“Dedä Korkutun mifologiya katları hem halk kulturası”), “Korkut Ata’nın Dili: Dil, Ağız ve Lehçe Çalışmaları” (Korkut Atanın dili: dil, aaz hem dialekt çalışmaları”), “Korkut Ata’nın Sözü: Söz Varlığı ve Okuma Sorunları” (“Korkut Atanın sözü: söz varlıı hem okuma soruşları”), “Anlamdan Söyleme: Dede Korkut’ta Aktarım ve Sözün Anlamı” (“Annamadan sölemeyä: Dedä Korkutta aktarım hem sözün annamı), “Korkut Ata’nın Zamanı: Tarih, Mit ve Hafıza Arasında” (“Korkut Atanın zamanı: istoriya, mif hem akıl arasında”) hem “Eğitimde Değer ve Kimlik İnşası: Dede Korkut’tan Öğrenmek” (“Üürediciliktä paalılık hem kimnik kurulması: Dedä Korkuttan üürenmäk”) başlıklı oturumnar düzennendi. Herbir oturumun sonunda katılımcılara “Katılım plaket”ları verildi.
Bütün Simpoziumda 75 bilim dokladı okundu. Onnarın arasında Gagauziyadan Akadmik Todur ZANET “Dede Korkut’un Anlatı Dünyası: Ozan, Töre ve Kahramanlık İmgesi” (“Dedä Korkutun annatmak dünnäsı: ozan, adet hem kahramannık biçimneri”) adlı oturumunda “GAGAUZ FOLKLORUNDA TEPEGÖZlär HEM TEPEGÖZlerin ÖLDÜRÜLMESİ” dokladınnan bilim insannarın önündä nasaat etti. Bundan karä Akadmik Todur ZANET baaşladı kendisinin türkologiya hem gagauz folkloru uurunda bilim-aaraştırma kiyatlarını Osmaniye Korkut Ata Universitetın bibliotekasına. Kiyat baaşlama sırasında pay aldılar Universitetın türk dili hem literaturası bölümün başkanı Prof. Dr. Ahmet DEMİRTAŞ hem dä bibliotekanın biblioteka hem dokumentațiya bölüm başkanı Necati GÖK.
Simpoziumun ilk günün başarılmasında Türkiye Kultura ministerliin Ankara Türk Dünnäsı Muzıka hem Tanț Ansamblisi bir konțert gösterdi, neredä Türk dünnäsının ayırı bölgelerindän melodiyaları hem türküleri çaldı hem dä oyunnarı oynadı. Krım tatar melodiyasından başlayıp, konțertin ikinci nomerı olarak, gagauz “Tatar çöşmesi” halk türküsünü çalındı.
Simpoziumun kapanışını Kasımın 13-dä Osmaniye Korkut Ata Universitetın rektoru Prof. Dr. Turgay UZUN, MHP Genel Başkan Başdanışmanı hem Ahmed Cevad İnstitutun Başkanı Prof. Dr. Ruhi ERSOY, Türkiye Fırat Universitetından Prof. Dr. Ahmet BURAN hem Prof. Dr. Esma ŞİMŞEK, Başkent Universitetından Prof. Dr. Abdurrahman GÜZEL yaptılar.
Hep o günü avşamneyin “HANIM HEYY Üç Avaz Bir Niyaz: Gelenekten Geleceğe Anlatılar Dede Korkut Hikâyeleri” (“Hanum heyy” – üç avaz bir yalvarmak: adetlerdän gelecää annadılan Dedä Korkut annatmaları”) adlı bir teatrulu okumak konțerti yapıldı.
“Dede Korkut/Korkut Ata” Simpoziuma katılannara deyni Kasımın 14-dä bir kultura gezi programası düzennendi. Gezidä Osmaniya kasabanın dolaylarınnan, “Kastabala Antik Kenti”, “Karatepe Kilim Evi” hem “Karatepe Aslantaş Açık Hava Muzesi” erlerinnän tanışmak oldu.
