Kırım ayın (dekabri) ayın 18-dä Moldova Premyer-ministrusu Alexandru MUNTEANU, nicä adadıydı Canavar ayın (oktäbri) 31-dä Moldova parlamentında pravitelstvoyu kablettirmää deyni nasaat edärkänä, Gagauziyaylan ilişkileri enidän kurulması başlatmaa deyni, Gagauziyaya iş vizitınnan geldi.
Esaba alarak onu, ani eski pravitelstvosunun politikasını götürmesini ilerletmää deyni, pravitelstvonun saytında bu önemni vizit için logoda ilktän yazmıştılar “Vizită de lucru în raionul COMRAT”, ama sora, bebelli, eni izin kablederäk, bu logoda artık “Vizită de lucru în UTA GĂGĂUZİA” yazılıydı, lääzım kabul etmää onu, ani Moldova Premyer-ministrusu Alexandru MUNTEANU Gagauziyaylan işbirliinä açıktan hazırdır. Premyer-ministrunun bu işbirliinä açıktan olmasını gösterer o da, ani Canabisi Gagauziyaya tek başına gelmedi, ama yanına çok yardımcı spețialistları da almıştı.
Lääzım urgulamaa onu da, ani vizit için açıklamada bildirildi, ani Canabisi buluşacek iş adamnarınnan, cümne insannarınnan hem merkezli toplu olmayan slujbaların temsilcilerinnän. Ölä dä oldu, çünkü Alexandru MUNTEANU buluşmadı ne gagauz halkın tarafından seçilän Gagauziya Halk Topluşundan bir kimseylän, ne da büünkü İspolkomun azalarından hiç kimseylän. Bölecä Gagauziyaylan işbirlii primarların uuruna indirilmiş bir işbirlii oldu.
Bu üzerä Premyer-ministru Alexandru MUNTEANUnun Gagauziyaya vizitı başldı Çadır kasabasından, çünkü Canabisinin açıklamasına görä, kendisinin Gagauziyaya gelmesinin sebepi dä Çadır primarın Anatoliy TOPALın buyur edilmesi olmuş.
Çadır kasabasında Alexandru MUNTEANU ilkin buluştu Gagauziya küülerin primarlarınnan hem primar yardımcılarınnan, nerdä incelendi onnnarın önündä peydalanan problemaların çözülmesi. Bu uurda Alexandru MUNTEANU urguladı, ani onnarı çözmää deyni pek önemni merkez hem erindeki kuvetlerin arasında düzgün bir dialog kurmaa.
Çadıra vizitinda Alexandru MUNTEANU uuradı Çadır biznes-inkubatoruna, neredä tanıştı burada işleyän terzilik fabrikasınnan hem el işleri yapan bir kuruluşun malllarınnan. Hep burada Canabisi buluştu iş adamnarınnan hem onnarın soruşlarını inceledi.
Çadıra vizitin son noktası oldu “İndustriya meydanı”n düzülmä eri, çünkü bu 34 milion leylik “meydan proertı” merkez, erindeki hem avtonomiya kuvetlerin ortaklık işbirliindä yapılêr. Proekt başarıldıynan, burada iş bulaceklar 500-1000 kişi.
Çadır kasabasından sora Moldova Premyer-ministrusu Alexandru MUNTEANU yollandı Çok-Maydan küüyünä, neredä tanıştı burada yapılan cümnä, infrastruktura hem kultura proektlarınnan. Bütün bu işlärlän Canabisini tanıştırdı Çok-Maydan küüyün primarı Oleg KONSTANDOGLU.
Alexandru MUNTEANUnun iş vizitının son noktası oldu Komrat “Nikolay Tretyakov” adına teoretik lițeyi, neredä Canabis tanıştı burada eni üüredicilik metodikaların temelleştirilmesinnän hem kurulan üüredicilik infrastrukturasınnan. Vizit sonunda, lițeyin üüredicilerinnän hem üürencilerinnän bir toplantıda, Premyer-ministru onnarın soruşlarına cuvap verdi.
Patertlär: Moldova pravitelstvosunun saytından.
