Başlayıp Kirez ayın 12-dän büübkü günädän Rusiyanın Sankt-Peterburg hem Pskov kasabalarında Gagauziyanın Günneri geçti. Günnerdä kulturamız, adetlerimiz hem literaturamız gösterildi. Bundan kaarä ekonomika uurunda kuvedimiz da açıklandı.
Gagauziyanın Günnerindä pay aldılar Gagauziyanın başkanı İrina VLAH hem onun ikinci yardımcısı Olesä TANASOGLU.
Günnerin çerçevesindä Sankt-Peterburgta Gagauziyanın temsilcilii açıldı (Admiral Lazarev sokaa, ev 16).
Gagauziyanın Günnerindä sankt-peterburglulara hem pskovlulara verildi kolayı tanışmaa anılmış gagauz resimcilerinin yaratmaklarınnan. Oralarda sergilendi Dimitriy SAVASTİNın, Sergey SAVASTİNın, Grigoriy DEÇEVın, Pötr FAZLInın, Mariya DİMOGLUnun, Vitaliy MANCULun, Mihail ARABACInın resimneri.
Sankt-Peterburgun milli literaturaları bibliotekasında açıldı gagauz literaturasının köşesi, neredä er aldılar gagauz yazıcıların Nikolay BABOGLUnun, Mina KÖSÄnin, Gavril GAYDARCInın, Vasi FİLİOGLUnun, Todur ZANETin kiyatları. Sergilerdä er verildi Mihail ÇAKİRin, Födor ANGELİnin, Stepan BULGARın, Mihail GUBOGLUnun kiyatlarına da.
Sankt-Peterburgta hem Pskovda gagauz artistlerin büük konţertlerı yapıldı. Onnarda pay aldılar anılmış “Kadınca” ansamblisi (önderci Avram KÖSÄ), artistlär Mariya KISA (TARANENKO), Vitaliy MANCUL, Pötr PETKOVİÇ hem başkaları.
Ekonomika uurunda Gagauziyayı tanıtmak için Sankt-Peterburgta gagauziya ekonomika kuvedinin prezentaţiyası yapıldı. 12 stend Gagauziyanın çeşitli ekonomika bölümnerini açıkladı: suvenirlerdän hem el işlerindän taa şarapçılık, konservacılık hem maasul mallarınadan. Bundan karä gösterildi karı rubaları, kilimnär hem kürkçü malları, ani yapılêrlar Gagauziyada, bildirer başkanın haber merkezi.
