Çiçek ayın 6-da Valkaneş teoretik liţeyin kapularını açtı tanınmış hem paalı yazıcımız, akademik Todur ZANET! Biz bileriz, ani Canabisi herbir kıpımını baaşlêêr halkımıza, bizä – gagauzlara.
Herkerä, açan onun yolu düşer Gagauziyanın en üülen noktasına, o unutmêêr kendi şükürlü okuyucularını: üüredicileri hem üürenicileri. Boş ellän da o bizä bir vakıt ta gelmeer.
Te kär ölä dä oldu Çiçek ayın 6-da sabaalän. O uuradı buluşmaya 5-ci klastan üürenicilärlän. Uşaklar sevinmelii kenarsızdı. Herbiri istärdi makar birazçık durmaa bölä anılmış yazıcının yanında: bişey sormaa, işitmää hem duymaa ana dilinin laf ustasını.
Buluşmanın sonunda yapıldı bir toplu patret, ki bu buluşmak kalsın onnarın aklısında hem cannarında. Gidecääzaman, saygılı yazıcımız, damnadarak cannarımıza bal döküp, dedi: “Sizi hepsinizi pek severim!” Buna pek sevindik hem inandık bunu, zerä o laflar sölendi ölään, ani cannarımız dalgalandı.
Not: Bu buluşmak, nicä bir nışandı. Taman bu günnerdä liţeyimiz hazırlardı türlü meropriyatiyaları, angıları baalıydı ana dilimiz yortusunnan.
Dora Panteleevna ONOFREY, Valkaneş liţeyin gagauz dilindä üüredicisi
