Nicä bilersiniz artık, 2024-cü yılın Hederlez ayın (may) 5-dä Gagauziya Halk Topluşu (GHT) Aleksandr TARNAVSKİYi saklı oylamaklan GHT Başı yardımcılıından attı. Bu kararı Canabisi, administrativ iskı olarak, Komrat suduna verdi.
Orak ayın (iyül) 23-dä Komrat sudu aldı karar, ani Aleksandr TARNAVSKİYi GHT Başı yardımcılıından atmaa Kararını “zakonsuz” tanımaa, hem onu Aleksandr TARNAVSKİYin “haklarını ezän” bulmaa, bu üzerdä o Karara anulirovaniye yapmaa. Sud urguladı, ani, Zakona görä, sudun bu kararı 30 günün içindä apeläțiyaya veriläbilinir.
Kendi tarafından Aleksandr TARNAVSKİY soțial aalarında şükür etti “kendi advokatına hem Femidanın hepsi izmetçilerinä, onnarın profesionallıkları hem obyektivlıkları için”. Bundan kaarä Canabisi şükür etti “onnara kim bu arada bana arka oldu – yakınnarıma, dostlarıma, tanıdıklarıma hem hepsi umursuz olmayannara”.
