Çiçek ayın (aprel) 1-dä yapılan brifingta Gagauziyanın saalıı koruma Upravleniyasının başı Svetlana DULEVA açıkladı, ani Gagauziyanın koronavirusa ulaşan şüpä altında bulunan kişilär için Komratta maasuz hazırlanan bolnițaya sade Gagauziyadan insannarı koyaceklar.
Taa ileri Gagauziya Başkanı İrina VLAH sölediydi, ani Komrat bolnițasına diagnostika için getirilecek sadä Gagauziyadan hem Moldovanın Taraklı rayonundan insannar, angılarında koronavirus simptomnarı olacek (bak: http://anasozu.com/gagauziyada-covid-19-ulasan-yok-ama-onnari-taraklidan-getireceklar/).
Bundan sora Gagauziyada insannarın arasında buna karşı kalkmak dalgası başladı. Onun için, nicä açıkladı Svetlana DULEVA, kuvettä bulunannar esaba aldılar Gagauziya insannarının bu duygularını, da karar aldılar, ani koronavirusa ulaşan şüpä altında bulunan kişilär için Komratta maasuz hazırlanan bolnițaya sade Gagauziyadan insannar alınacek.
