Ceviz ayın (sentäbri) 12-dä Çöşmä küüyündä duuan anılmış gagauz jurnalistkanın Ekaterina JEKOVAnın çalışmalarınnan hem parasınnan, tertiplenmektän hem düzülmektän sora, Çöşmä küüyün en eski çöşmesinin açılma kurbanı yapıldı. Sayılêr, ani bu çöşmä Çöşmä küüyün kurulma günündän beeri var, akêr hem da suuk hem duruksuyunu insannara verer.
Açılma kurbanın sırasına katıldılar Gagauziya İspolkomun predsedatelin birinci yardımcısı, çöşmäküülü Vadim ÇEBAN, küüyün primarı Pötr MACAR, jurnalistka Ekaterina JEKOVA, cümne insannarı hem küülülär.
Çöşmenin açılış şiridini kestilär en yaşlı çöşmäküylü adamnar, nedän sora küüyün popazı ierey Väçeslav çöşmenin okumak slujbasını yaptı.
Ekaterina JEKOVAnın teklifinä görä çöşmeyä erleştirildi Kazan Panayiyanın İkonası, ani Aynoroz manastırından getirilmiş hem bu çöşmeyä verilecek ad “Ana Çöşmä”.
Neettä var, ani bu çöşmä olacek küüyün ofiţial simvolu hem onun yanında küüyün dinnenmäk parkı dikilecek.
Açılış kurbanın sırasının bitkisindä küülülerä bir konţert gösterildi, angısında pay aldılar çöşmäküülü artistlär Natalya TOMAYLI, Sergey PETKU, İrina PODOYLOVA, Marina SEMENOVA.
Not. Çöşmä küüyün kurlmasınnan ilgili versiyäyaların birisinä görä küüyü kurmuş 18 aylä, ani erleşmiş bu çöşmenin yanında 1809-cu yılda da çöşmeyä görä küüyün adını da koymuşlar – Çöşmä küüyü.
Fotolar – gagauzmedia.md hem gagauzinfo.md
