Çiçek ayın 22-dä Tomay kultura Evi bir konţert yaptı, angısını adadı “Ana Dili” yortusuna. Konţertä geldilär küüyün üürencileri, üüredicileri, kultura insannarı, aşırıdan musaafirlär. Maasuz bu yortu için küüyün bibliotekacısı Lüdmila KUŢAROVA kultura Evindä hazırlanmıştı üç kiyat sergisi: “Halkın en paalı zenginnii – onun Ana Dili”, “Eni zamannar – eni adlar” hem “Todur Zanet”.
“Ana Dili” yortusu başladı üülendän sora da may iki saat tuttu, zerä, primariyanın yardımınnan, kultura Evimizin insannarı hem liţeyin üürencileri bütün ürektän onu hazırladılar.
Yortuyu açtı hem götürdü Tomay kultura Evin direktoru Pötr İvanoviç KUŢAROV. Sora kultura Evimizin halk muzıka ansamblisinin öndercisi İvan TANASOGLU gözäl bir gagauz türküsünü çaldı hem “Şen kızlar” («Веселые девчата», öndercisi Galina KELEŞ) ansamblisi, sţenaya çıkıp, gagauz halk oyunnarını oynadı.
Bu gözäl nomerlerdän sora da, zalda bulunannara danışmak için, laf verildi Tomay küüyün primarına Födor Födoroviç TOPÇUya. Canabisi kutladı hepsini Ana Dili yortusunnan hem açıktan sevindi, ani bölä gözäl bir yortu halkımızda var. Canabisi hepsinä saalık, uzun ömür hem yaratmak kısmetleri diledi.
Kultura Evin, küü bibliotakasının hem liţeyin çalışmalarınnan o günü iki büük yazıcımıza yaratmak prezintaţiyası gösterildi. Sţenadan, interaktiv taftanın yardımınnan, annadıldı Dionis TANASOGLUnun hem Todur ZANETin yaşamaları, yaratmaları hem gösterildi onnarın patretleri.
Söz verildi yortumuzun o günkü baş musaafirimizä yazıcıya hem poeta Todur ZANETä dä. Canabisi sevindi, ani kultura Evin zalı dop-dolu hem ani zalda bulunannar büük havezlän seslerlär o gözäl hem şıralı sozleri, ani sţenadan akêrlar. O okudu kendisinin iki peetini hem baaşladı bibliotekamıza kendi kiyadını.
Yortu ilerledi. Tomay liţeyin üürencileri okudular kendilerinin hem gagauz poetların Dionis TANASOGLUnun, Dimitri KARAÇOBANın, Pötr ÇEBOTAR-GAGAUZun, Lübov ÇİMPOEŞin, Vasilisa TUKANın, Todur ZANETin peetlerini. Gagauz masallarına hem fıkralarına sţenka gösterdilär: “Dädunun hem babunun evi” hem “Padişahın eşää”.
Şennendirdilär zalda bulunan insannarı kultura Evimizin türkücüykası Olga KAPSAMUN hem oyun ansamblisi “Altıncık” (öndercisi Afanasiy GARGALIK) oyunnarlan “Üç ayak” hem “Kadınca”. Başardı bu gözäl yortuyu anılmış türkücüykamız Mariya TOPAL.
Pötr İvanoviç KUŢAROV, Tomay kultura Evin direktoru
