Çiçek ayının 22-dä Genç gagauz yazıcılar birliinin başı Alla BÜÜK hem kurucu-aza Viktor KOPUŞÇU Baurçu liţeyindä üürenicilärlän buluştular, yazêr Genç gagauz yazıcılar birliinin saytı.
Buluşmakta musaafirlär annattılar kendi işleri için, ne onnar yapêrlar, nesoy proektlar var ileriyä dooru. Viktor KOPUŞÇU urguladı, ani gagauz dilinin hem literaturasının gelecää gençlerin elindä.
“Biz hazırız herbirinizlän barabar işlemää, sizi yaratmalarınızı çıkarmaa “Hakikatın sesi” gazetasında hem başka toplumnarda, teklif etmää sizi türlü literatura buluşmaklarına”, – söledi o.
Alla BÜÜK paylaştı fikirlerini ana vatan için hem gagauz dili için hem teklif etti üürenicilär aktiv olsunnar küüyün hem Gagauziyanın yaşamasında.
“Büünkü ekonomika koşullarında çok önemni korumaa kendini, demelik, unutmamaa, ani biz hodul bir gagauz halkı, lafetmää gagauz dilindä hem bütün dünnedä metinnemää bizim halkımızı”, – urguladı Alla BÜÜK.
Üürencilär okudular kendi yaratmalarını ana dilindä, onnarın arasında en genç Eduard SLAV kabletti baaşış – “Sabaa yıldızı” jurnalını, neredä tiparlandı genç yazıcıların hem peetçilerin yaratmaları hem “Oguz sesi” peet toplumunu, haberleer gagauz saytı haber.md.
