Kongazın 2-ci uşak başçasında Çiçek ayın 22-dä oldu pek meraklı bir meropriyatiye – “Biz – gagauzlar!”, angısını uşaklarlan bilä bütün kollektivımız hazırladı. Meropriyatiyayı götürdülär gagauz dilindä üüredici Mariya Mihaylovna KULİŞ, ona yardımcı oldu muzıka öndercisi Anna Pavlovna YULARCI.
Meropriyatiye uşak başçamız tarafından Ana Dili yortusuna adandı hem yapıldı. Taa ileri biz bu yortuylan ilgili başka meropriyatiyalar da yaptık. Onnarın arasında: resim yarışması, uşaklara gagauz imeklerin annadılması, yapıldı albom “Benim küüyüm”, geçti akţiya “Lafederiz gagauz dilindä”, peet okumak yarışması, gagauz yazıcıların partelerinnän donaklı gagauz dilindä kiyatların sergisi hem başka. Ama “Biz gagauzlar” miropriyatiyası oldu bu meropriyatiyaların toplu hem baş yortusu.
Bu yortuya o günü geldilär gagauz yazıcısı hem poetı Todur ZANET, uşakların anaları hem bobaları. Küülü yazıcımızı uşaklarımız, kapu önündä, tuz-ekmeklän karşladılar hem zala geçirdilär.
“Biz – gagauzlar!” miropriyatiyasını Gagauziya gimnasınnan başladık, angısını gagauz milli rubalarına giimni uşaklar seslän çaldılar. Sora uşaklar annattılar gagauz poetların Gagauziya hem Ana Dili için peetlerini, oynadılar gagauz halk oyunnarını hem, maasuz bu gün için hazırlanmış, “Çobancıklar” oyununu.
Pek meraklı sţenkaları hazırladılar uşaklarlan terbiedicilär. Onnar ölä meraklandırdı uşakları hem yortumuzun o günkü musaafirlerini, ani zalda durmamayca gülmäk hem auç sesi işidilärdi. Uşaklar rollerä görä peet annatılar hem birkaç sţenka gösterdilär. Onnarın arasında: “Dädunun hem babunun evleri” gagauz masalına görä hem “Padişah hem eşek” Nastradin fıkrasına görä sţenkalar da vardılar.
“Biz – gagauzlar!” miropriyatiyasının sonunda zala getirildi “Gagauziya – benim küçük Vatanım” adlı resim yarışmasında enseyän resimnär da o resimneri yapan uşaklara baaşışlar verildi: resimnemäk için kiyatlar hem resimcilik tertipleri.
Meropriyatiyanın kapanmasında laf verildi poeta Todur ZANETä. Yazıcı kutladı hepsini Ana Dili yortusunna hem, uşak başçamızdan Vitä STAEVlan bilä, okudu zalda bulunannara kendi peetini “Patırdak” hem baaşladı uşak başçamıza kendi kiyatlarını.
Sofya Demyanovna TERZİ, Kongaz küüyün 2-ci uşak başçasının direktoru
