Kongaz küüyün 4-cü uşak başçasında “Yaşasın ana dilimiz!” adında şenniin hazırlanmasına uşak başçasının öndercisi, terbiedicilär hem gagauz dilindä üüredicilär, gagauz folklorun hem ruhunnan uşakları hazırlayıp, kendileri da ölä hazırlandılar.
Bundan kaarä evimizindä erleştirimişti uşakların resim sergisi – “Ana dilim tatlı bal”. Uşaklar da, terbiedicilär da giimniydilär donaklı hem çeşitli gagauz milli rubalarına hem şenniktä barabar pay aldılar.
Lääzım urgulamaa, ani Çiçek ayın 22-dä olan “Yaşasın ana dilimiz!” adında şennik Ana Dili yortusunun çerçevesindä yapılan meropriyatiyaların son noktasıydı. Taa ileri gagauz dilindä üüredici Olga Konstantinovna KARASTOYAN sıravardı hazırladı meropriyatiyaları, angılarında annadıldı gagauz milli giimneri, gagauz adetleri, gagauz imekleri hem gagauz halk oyunnarı. Bu meropriyatiyaları uşaklarlan da analara-bobalara gösterdi.
“Yaşasın ana dilimiz!” adında şennik başladı Gagauziyanın gimnasından. Sora uşaklar, tuz-ekmeklän karşlayıp poetı Todur ZANETi, okudular ona hem büük başımızda bulunan insannara Gagauziya, Bucak hem Ana Dili için gagauz poetların peetlerini, çaldılar gagauz halk türkülerini hem türküleri, angılarını yazdı uşaklar için uşak başçasının muzıkada üüredicisi Mihail PAÇİ. Şennik vakıdı uşaklar oynadılar birkaç gagauz halk oyununu da.
Becerikli gösterdilär kendilerini uşaklar sţenkalarda da. O sţenkaları hazırlamaa deyni uşaklara yardımcı oldular onnarın terbiedicileri hem uşak başçasının baş terbiedicisi hem metodistı Mariya Dimitrievna ÇEBANOVA. Uşaklar, haliz artistlär gibi, oldular masallar kahramannarı: Oglan hem Nastradin (“Hoca Nastradin” fıkraları), Balakir hem Çorbacı (“Balakir hem Çorbacı” fıkrası), Dädu hem Babu (“Altın yımırta” masalı).
Pek meraklı oldu Oglanın (terbiedici Anna KOMUR ) koyun sürüsünnän hem Nastradinin (terbiedici Anna SABİYA) eşeklän uşaklara musaafirlää gelmäk sţenkası da.
Şennik programasının bitkisindä uşak başçanın öndercisi, terbiedicilär hem gagauz dilindä üüredicilär gagauz horusunu hem “Üç ayak” oyununu oynadılar.
Sonunda söz verildi poet Todur ZANETä. O şükür etti uşak başçanın kolektivına hem uşaklara bölä gözäl hazırlanmış programa için hem kutladı hepsini zalda bulunannarı Ana Dili yortusunnan. Canabisi okudu uşaklara peetlerini hem baaşladı bizä “Böcecik” hem “Koorlaşmış ateş…” kiyatlarını.
Anna İlyiniçna BUÇKOVA, Kongaz küüyün 4-cü uşak başçasının direktoru
