Komrattan geldi büük bir kara haber – Kırım ayın (dekabri) 22-dä raametli oldu gagauzların geniyi, Allahtan büük hem talantlı resimci Dimitriy İvanavoç SAVASTİN!
Dimitriy SAVASTİN bütün yaşamasında gagauzlara hem Gagauzlaa izmet etti. Helal Sana – Dimitriy İvanavoç SAVASTİN!
Bu yılın başında Dimitriy İvanoviç SAVASTİNını kiyadını hazırlarkana (Gagauziya İspolkomu adadıydı bu kiyadı çıkarmak için para vermää, ama…) kiyadın ön sözündä yazdıydım: “Söläyin bana: angı resimci bukadar yandı Gagauzluk için? angı resimcinin yaratmaklarında bukadar gagauzluk ruhu hem özü var? angı resimcinin talantınnan taa gagauzları dünnedä bukadar tanındılar? angı resimci bukadaradan gagauzlara hem gagauzlaa izmetä kurban oldu?
Yok ölä birisi!
Hiç kıvırmadaan hepsi lääzım kayıl olsun onunnan, ani bu BÜÜK RESİMCİ – Dimitriy İvanoviç SAVASTİN! Sade onun geniyi bu işleri en üüsek uurda yapmaa becerdi”.
Hep o ön sözdä bu lafları da yazdıydım o sözleri, ani tiparladıydım taa 2013-cü yılın Çiçek ayın (aprel) 27-dä, “Ana Sözü” gazetanın 7-8 (578-579) nomerindä: “Onuştan, sayêrım, ani Gagauziyanın başında bulunan öndercilär lääzım nekadar tez, BÜÜK RESİMCİ taa ayaktaykana, kursunnar Dimitriy SAVASTİN adına bir fond, neredä toplanacek bu adamın bütün yaratmak zenginnikleri. Gagauziyada lääzım kurulsun “Dimitriy SAVASTİN” ordenı yada medalisi, angısınnan şannandıraceklar talantlı resimcileri hem incäzanaatçıları, ani Dimitriy SAVASTİN gibi, halizdän izmet ederlär gagauzlara hem gagauzlaa, gagauz folkloruna, kulturasına, incäzanaatına, adetlerinä hem istoriyasına”.
Genä danışêêrım Gagauziya öndercilerinä: “Barliim, BÜÜK RESİMCİ raametli olduktan sora kurun Dimitriy SAVASTİN adına bir fond, neredä toplanacek bu adamın bütün yaratmak zenginnikleri. Gagauziyada lääzım kurulsun “Dimitriy SAVASTİN” ordenı yada medalisi, angısınnan şannandıraceklar talantlı resimcileri hem incäzanaatçıları, ani Dimitriy SAVASTİN gibi, halizdän izmet ederlär gagauzlara hem gagauzlaa, gagauz folkloruna, kulturasına, incäzanaatına, adetlerinä hem istoriyasına”.
Bän sa, Büük Ustanın önündä, şapkamı çıkararak, deerim: “Gagauzların geniyi, Dimitriy SAVASTİN, önündä başımızı iilderiz!” Hem söleerim: “Sän, Maêstro, daymaların-daymalarında kalacan gagauzların hem bütün dünneyin istoriyasında, nicä bir BÜÜK hem ANILMIŞ insan hem resimci. Deerlär geniylär üz yılda bir kerä duuêrlar. Bekim ölä, bilmerim. Ama şindilik sän bizdä biriciksin!.. Topracıın ilin olsun, paalı dostum, Dimitriy İvanoviç SAVASTİN!”
Akademik Todur ZANET
Not. Kırım ayın (dekabri) 24-dä Beşalma küüyün mezarlıında Dimitriy İvanavoç SAVASTİN topraa verildi.
Anaktar sözlär : Dimitriy İvanavoç SAVASTİN, Дмитрий Иванович Сававстин
