tren_gitti_

28.08.2021, tarafından yazılı , CÜMNE BÖLÜMÜ, 7097 KERÄ BAKILMIŞ

Tren gittiynän Gagauziya Başkanı eşinmää başladı

Harman ayın 24-dä Moldova Parlamentında “Moldova Respublikasının Prokuraturası için” zakonuna diiştirmekleri ikinci hem son okumakta kabledilmesindän sora, Gagauziya Başkanı İrina VLAH, bu uurda biraz dalga yapmak için, eşinmää başladı, bileräk ani artık geç, çünkü Zakon geeri dönmäz. Ama bu eşinmelärlän Gagauziya Başkanı kiminsa önündä suratını kurtarmaa pek isteer (bak: https://gagauzinfo.md/top1/61722-bashkan-irina-vlah-nastaivaet-na-vklyuchenii-prokurora-gagauzii-v-sostav-vsp.html).

Açan Harman ayın 13-dä Moldova Parlamentı tarafınfan ilk okumakta kabledildi “Moldova Respublikasının Prokuraturası için” zakonuna diiştirmeklär, neredä belli oldu, ani kuvettä bulunan partiya Gagauziyayı temeldän sökmää başladı, Gagauziya Başkanı İrina VLAHtan buna karşı bir “gık” ta çıkmadı. Taa da beter, ançan lääzımdı çannarı düümää hem büünkü eşinmeyi yapmaa, Canabisi kırları gezärdi hem konuylan hiç ilgilenmäzdi (bak: http://anasozu.com/gagauziyayi-temeldan-sokerlar-gagauziyanin-garanti-gagauziya-baskani-kirlari-gezer/).

Taa sora da, açan insanı ayaa kaldırmaa vakıt taa vardı, en aazdan Gagauz Respublikasının 31-ci yılın kutlamasında, Gagauziya Başkanı genä sustu da Romıniyaya gitti (bak: http://anasozu.com/gagauz-respublikasinin-erina-gagauziya-baskani-rominiyayi-ayirdi/).

Şindi da, açan “Moldova Respublikasının Prokuraturası için” zakonuna diiştirmekleri ikinci hem son okumakta Parlamentında kabledildi hem tren gitti Gagauziya Başkanı eşinmää başladı, maamilä surat o bu zakona karşıymış.

Aklımıza geler bir fıkra: Bir çıfıt kendisini öldümää karar almış. Gitmiş demir yoluna. Beklemiş tren geçsin da sora, koyarak kafasını relsanın üstünä hem bakarak uzaklanan trenin kuyruuna, demiş: “Taa islää geç olsun, ani hiç olmasın!””.

Yazık, ani o tren Gagauziyanın ensesindän geçti, ama bu Gagauziya Başkanı hiç acıtmadı, çünkü, ortalıkta gezän laflara görä, Canabisi umut eder, onun önündeki Başkan gibi, Evropa Briliindä bir sıcacık yuvada erleşmää.

BİR CUVAP YAZIN