Kasım ayında bakılan gagauzların büük “Kasım yortusu” sıralarına, Gagauziyaya dostluk hem kultura baaları güçlendirmӓk için, Türkiyedän bir bölüm musaafir dä katıldı – zanatçılar, üüredicilär, bilim doktorları.
Türkiyedän gelän bu musaafirlerä kendi adetlerini hem kulturasını gösterdip, gagauz halkı onnarı aarlamaktan pek mutlu oldu. Musaafirlär kendileri dä, Gagauziyayı gezip, gagauzların kulturası için çok bilgi aldılar. Çadır hem Komrat kasabalarında geçän yortular sırasına katılıp, burada gagauz kulturasını hem adetlerini taa islää tanıdılar. Gagauzlarlan da lafederäk, annadılar ani gagauzlar onnarın karadenizlilӓr dedeleri gibi lafederlӓr. Türkiyedӓn gelӓn saygılı musafirlӓr istoriya hem kulturayı inceledilӓr. En çok sevindilӓr ona, ki gagauz türkçesinnӓn lafedän halklan raat bir türk dilindӓ konuşup, annaşabildilӓr.
Musaafirlär küüyleri hem kasabaları dolaştılar, gezdilӓr, köklerini aaradılar. Ayırı inançlan olarak insannarlan tanıştılar. Klisenin başçasında hem pazarda yaşlı bulülärlän lafettilӓr, onnarın duyguylan dolu bakışlarını görӓbildilӓr. Komrattakı 5-ci uşak başçasına gelerӓk, o küçük yavruların büülü gösterilerini siirettilär hem “Türk rayonnarında bir gülär üz Platforması” adından, bu Platformanın Konyalova dernek Başkanı Tekin SARIÇAM uşaklara pek gözäl baaşışlar verdi.
Bundan kaarä Çadır, Komrat hem Gagauziyanın kimi başka primarlarınnan buluşup, Türkiyedän musaafirlär “Türk rayonnarında bir gülär üz Platforması” hem onun çalışması için annattılar hem Gagauziyada yapılabilir ortak peroektları hakkında lafettilӓr.
Gagauzlar için taa çok bilgi almak için Komrat ATATÜRK türk bibliotekasınnan tanıştılar. Burada Türkiye hem gagauz halkları arasındakı baaların istoriyasını hem kultura önemniini gördülӓr.
Komrat Devlet Üniversitetın rektoru Serghei ZAHARİYAylan buluşmakta ortak peroektları için lafettilӓr.
İki devlet arasında istoriya baalara da urgu yapan musafirlerimiz, Türkiye hem Gagauziya arasındakı ilişkileri taa ii noktalara getirmӓk için, gönüllü çalışacaklarını söledilӓr. Biz dä onnarın bizä buyur etmelerinä çok sevindik. Kısa zaman içindӓ tekrar gelmelerini isteeriz.
Lidiya OSTAŞ, Gagauziya üüredicilik Upravleniyasının zaametçiykası
