Ceviz ayın 24-dä gagauzların dostu Türkiye Prezidentı Recep Tayyip ERDOĞAN, Birleşik Milletlär Topluluun (BMT) 74-cü Genel Toplantısının açılışında nasaat edip, Palestinadan Kaşmirä, İslamofobiyadan Siriyadakı güvenni bölge çalışmalarına, nukliar siläh dartışmalarından İzrail sorununa kadar pek çok konularda mesajlar verdi.
Recep Tayyip ERDOĞANın nasaatının kilit noktaları bunnardı:
– Dünnää 5-tän büüktür (“AS” nışanı – laf gider BMT Güvennik Sovetinin 5 dayma azaları için: Amerika, Büük Britaniya, Franțiya, Kitay hem Rusiya).
– Büünkü gündä Türkiye diil salt musulmannıı, ama bütün dünnääyı hem insannıı kucaklayan bir memlekettir.
– Siriya krizisını artık sona getirmää zamanı geldi.
– Türkiyeyä kaçan hem sıınan insannarın sayısı 3 milion 650 bin oldu. Bütün bu ükü Türkiye yalnız kaldırêr. Buulan Aylan uşacıı dünnää çabuk unuttu.
– Bütün teror organizațiyalarına bir uurdan bakılan bir annaşma erleştirmedään Siriya durumuna kalıcı bir çözüm bulamayacez.
– Türkiyenin öncülüündä güvennik bölgesinin çerçevesindä, Livan, İrak hem İordaniya katılmasınnan bilä, Halklararası bir konferențiya plannêêrız.
– Kıbrız konusu hem Türkiyenin Dou Akdenizlän ilgili hakları hem interesleri.
– Liviyanın güçlenmesi hem Poyraz Afrikayı hem da Evropayı raatladacek.
– Palestina İzrail arasındakı işlär için söleyeräk hem İzrailin kurulması günündän (29.11.1947 yıl) bu günädän kartaları göstereräk dedi: “Bän merak ediyorum bu İzrail neresidir, acaba bu İzrailin toprakları nereleri kapsıyor, 1947-dä İzrail neresiydi, bunun ardından acaba 1949, 1967-dä İzrail neresiydi hem şindi İzrail neresi?… İzrail doyêr mı, yok doymêêr!”
– Ezilän Palestina halkının yanında Türkiye er almaya devam edecektir.
– Üülen Azyanın raatlıı Kaşmir konusundan ayırı düşünülämäz.
– Musulmannarı öteekileştirän herkez, hastalıklı akımnarın üüselişinä temel koyêr.
– İnsannaa karşı sorumnuluklarımızı erinä getirmää devam edecez.
Birleşik Milletlär Topluluun (BMT) 74-cü Genel Toplantısının uurlu olmasını dileräk, Türkiye Prezidentı Recep Tayyip ERDOĞAN nasaatın sonunda dedi: “Herkez için serbestlik, herkez için barış, herkez için bereket, herkez için dooruluk, herkez için mutlulu hem güvenni bir gelecek!”
Akademik hem poet Todur ZANET
Kaynak hem fotolar: aa.com.tr
