Cumaa günü, Büük ayın (yanvar) 31-dä Komradın İoan Vatizedici klisesindä ayozlu slujba oldu hem liturgiya okundu, neredä “Ana Sözü” gazetanın redaktoru akademik Todur ZANETin teklifinä görä, Türkiyenin Elazığ tarafında er tepremesindä hem hepsi tepremelerdä bir kabaatsız ölennär için dua yapıldı hem koliva kaldırıldı.
Bu ayozlu Slujbayı götürdü popaz Ay-Boba Vasiliy hem ona yardımcı oldular popaz İulian hem popaz Dimitriy.
Ayozlu liturgiyadan hem slujbadan sora ölülerin cannarı için dualar yapıldı hem koliva, okunup, kaldırıldı. Bu sıralardan sora kendi nasaatında Ay-Boba Vasiliy dedi:
“Büün andık biz onnarı, ani Türkiyedä Elaziğta geçinmişlär bu büük tragediyadan, er tepremesindän. Onnarı andık, zerä Allaa onnarı prost etsin, zerä bu kahır geldi onnara ansızdan. Bu aylelärä, ani kaybettilär kendi uşaklarını, kendi adamnarını, kendi yakındıklarını, Allaa versin onnra kuvet, ani geçirmää bu büük kahırı. Allaa kurtarsın onnarı. Allaa versin hepsimizä kuvet, sabur. Allaa hepsini prost etsin da kabletsin saa tarafına”.
Slujba bittiktän sora hem koliva kaldırıldıktan sora Todur ZANET dedi:
“Büün gagauz halkı dua etti Türkiyemizin Elaziğ kasabasında er tepremesindä kabaatsız kurban olan cannar için. Allaa onnarı kabletsin saa tarafına. İsterim biläsiniz, ani biz herkere Türkiye halkın yanındayız, nicä da Türkiye bizim yanımızda herkerä. Elaziğı, Türkiyeyi pek severiz. Onun için candan bütün duaları yaptık. Alla versin ilerdä bölä tepremnär olmasın, başımıza bölä belalar gelmesin”.
Gagauziya Komrat kasabasının İoan Vatizedici klisesinndä yapılan Türkiyenin Elazığ tarafında er tepremesindä hem hepsi tepremeleredä bir kabaatsız ölennär için slujbada hem koliva kaldırılmasında pay aldılar akademik Todur ZANET, yazıcı Galina SİRKELİ, kultura insanı Tatyana KOÇAN, Komrat Mihail ÇAKİR pedagogika kolecın üüredicileri, üürencileri hem cümne insannar.
Not. Büük ayın (yanvar) 24-dä saat 20:55-tä Türkiyenin Elaziğ kasabasında hem dolaylarında olan er tepremesindä 41 kişi öldü hem 1607 insana yaralandı.
