Ukraynadan pek gözäl bir haber geldi – Türkiyenin Türk İşbirlii hem Koordinaţiya Agenstvosu (TİKA) Reni rayonun Kotlovina (Balboka) küüyündä Kultura Evin tertiplemesi hem donatması proektını başardı, verip kolayını gagauzların kulturası ileri dooru da genişlensin hem korunsun.
Kotlovina Kultura Evinä, düzüldüü gündän (1997 yılı) beeri, hiç bir kerä remont yapılmamıştı da bu üzerä 70% dökülmä durumundaydı. Onuştan çok yıllar onun kolayılkları kullanılmadı. Şindi sa, başarılan proekta görä, Kultura Evindä elktrika, su, kanalizațiya , havalandırma, yangın habercilii, yangına karşı su sisteması enilendi hem içlän dışın incä işleri da yapıldı, kapular hem pençerelär diişildi, eni örtü koyuldu.
Hepsi bu işlerdän sora TİKA Kultura Evinä mebel, tehnika tertipleri hem muzıka instrumentleri aldı.
