Kasım ayın 1-dä Ukraynanın Bolgrad rayonun Vinogradovka (eski adı Kurçu) küüyündä büük şenniklän hem sevinmeliklän gözäl bir “Gagauz Kultura Merkezi” açıldı. Bu merkez Ukraynada şindilik biricik.
Merkezin açılması için çok zaamet ettilär Odesanın bölgä Radasının deputatı Yuriy DİMÇOGLU, “Bütün Ukrayna gagauzlar Birlii” başı Vasiliy KELİOGLU, Odesa gagauzların “Birlii” milli-kultura cümne başı Pötr VOLKOV, Vinogradovka küüyün başı Aleksandr ARABACI, “Gagauz Kultura Merkezi” direktoru Olga KULAKSIZ, küüyün insannarı, üüredicileri, kultura zaametçileri.
Adetä görä, ev saabileri küüyün kultura Evin önündä açılışa gelän musaafirleri ilktän çotradan şaraplan ikram ettilär, sora da tuz-ekmeklän karşladılar şannı musaafirleri: Ukraynanın halk deputatını Anton KİSSEyi, Odesin bölgä Radasının deputatlarını Yuriy DİMÇOGLUyu hem Mariya POPOVAyı, “Bütün Ukrayna gagauzlar Birlii” başını Vasiliy KELİOGLUyu, Odesa gagauzların “Birlii” milli-kultura cümne başını Pötr VOLKOVu, Gagauziyadan musaafirleri.
O gün için kultura Evin içersindä kuruluydu masalar küülü ustaların el işlerinnän, milli imeklärlän. Belli ki musaafirlär hepsi bu meraklı işlärlän tanıştılar hem imeklerdän dattılar.
Sora, “Gagauz Kultura Merkezin” direktoru Olga KULAKSIZ tanıştırdı insannarı Kurçu küüyün büünkü musaafirlerinnän hem, kısa nasaatlardan sora, “Gagauz Kultura Merkezin” ofiţial açılşı oldu.
Lääzım urgulamaa, ani “Gagauz Kultura Merkezi” pek kırnak hem kıvrak kurulu. Merkezin bir odasında küüyün hem gagauzların istoriya muzeyi erleştirili. Başka bir odada gagauzlar için hem gagauzça kiyatların bibliotekası bulunêr. Hep o odada gagauz yazıcıların büük patretleri erleştirili.
Merkezin aşılışından sora kultura Evin sţenasına çaarıldı Yuriy DİMÇOGLU. Canabisi annattı o işlär için, ani kendisinin hem Ukraynadakı gagauz Birlikleri tarafından gagauz dilin, adetlerinin hem kulturasının korunması için yapılêr. Yuriy DİMÇOGLU adadı, ani tezdä baaşlayacek “Gagauz Kultura Merkezinä” bir kompyuter hem çok funkţiyalı bir printer.
Sora da yortunun hepsi şannı musaafirlerini sţenaya çaarıldılar. Biri-biri ardı söz alıp, onnar kendi baaşışlarını da eni açılan Merkezä baaşladılar. Ölä Vasiliy KELİOGLU baaşladı paalı bir fotoapparat, Pötr VOLKOV yardım için para verdi, Komrat Devlet Universitetın ekonomika fakultetın dekanı Dr. Konstantin TAUŞANCI (kendisi kurçulu) okuru KDU Rektorun Zinaida ARİKOVAnın kutlama mesajını hem baaşladı kultura Merkezinä ilk gagauz “Canavar kafalı” bayraa, poet hem yazıcı Todur ZANET okudu peetlerini hem baaşladı kurçululara kendi kiyatlarını. Başka musaafirlär da kultura Merkezini baaşışsız brakmadılar.
Kultura Evinä toplanan insannara deyni Vinogradovka küüyün artistieri bir konţert gösterdilär. Konţertä pay aldılar Moldovanın kıymetli artistı Pötr PETKOVİÇ hem Ukraynanın talantlı türkücüsü Natali DENİZ.
Ofiţial meropriyatiyalardan sora, ev saabileri gözäl bir konuş masası kurmuştular. Orada da tostlar hem sözlär ilerledilär. Söz alannarın arasında vardılar Ukraynanın gagauz hem bulgar Aleksandrovka, Dimitrovka, Çervonoarmeyskoe, Kotlovina küülerinin başları. Şennik geç vakıdadan sürttü.
Fotolar – topor.od.ua
Anaktar sözlär : Kurçu, Болград, Виноградовка
