Baba marta ayın 28-dä çıkan “Ana Sözü” gazetasında biz yazdıydık, ani “
Ortaya çıktı, ani Moldova Respublikasının üüredicilik hem aaraştırma ministerlii kabletmiş şkola öncesi üüredicilik kuruluşlarında (uşak başçalarında) ştatlar listesini, neredä var romın dili üüredicileri, ama GAGAUZ DİLİ ÜÜREDİCİLERİ YOK”.
Ozaman bu karar Gagauziyanın bütün cümnesini, tepremäk gibi, sarsılattı, zerä o GAGAUZ DİLİN yok edilmesinä yolları açtıydı.
Gagauziya üüredicilik Upravleniyası hem bütün üüredicilik kuruluşları bu Karar karşı savaşmaa başladılar, çünkü
O Kararlan bilä Gagauziyanın uşak başçalarında işleyän Gagauz dilindä 70-tän zeedä üüredici iştän atılacek kertiinä geldilär hem uşak başçalarında Gagauz dilin üürenmesi yok olacek durumu gelecekti.
Bu karara karşı Gagauziyadan uşak başçaların 100-dän zeedä direktorları hem Gagauz dilindä üüredicileri imzaladılar hem yolladılar Moldova Prezidentı Maya SANDUya hem Moldovanın üüredicilik hem aaraştırma ministrusu Dan PERCIUNa (Dan Perçun) adlarına bir kiyat, neredä teklif ettilär bu şkola öncesi üüredicilik kuruluşlarında (uşak başçalarında) ştatlar listesi enidän gözdän geçirilsin, da orada uşak başçalarında Gagauz dilin üürenmesi korunsun. Bu danışmada sora, Moldova Respublikasının üüredicilik hem aaraştırma ministerlii aldı karar, ani Kirez ayın (iyün) 27-dän beeri şkola öncesi üüredicilik kuruluşlarında (uşak başçalarında) ştatlar listesinä, ofițial olarak, gagauz dili üüredicilerini da koymaa. Bu karar Monitorul Oficial jurnalında artık tiparlandı. Ama bunun aması da var.
Nicä bildirer Gagauziya üüredicilik Upravleniyası – bu karar parçalı bir karar, çünkü o Gagauziya avtonomiyasının şkola öncesi üüredicilik kuruluşlarında (uşak başçalarında) lääzımnı sistemanın bütünnüünä uymêêr: stavkalar düşük, paralar da veriler sade ortanca grupalardan üüretmeyä deyni (ileri ikinci grupalar uurunda başlardı). Belli ki, bu ana dilin üürenmä kalitesini mutlaka düşürecek, zerä biliner, ani dil üürenmesinä nekadar taa erken dalmak olêr o taa islää sonuçlara islää sonuçlara getirer.
Büünkü gündä gagauz dilini 56 uşak başçasında 5258 uşak üürener, angılarını 70-tän zeedä gagauz dilindä üüredici üüreder.
