Türk İşbirlii hem Koordinaţiya Agenstvosu Başkannıın (TİKA) yardımınnan Çadır kasabasının saalık Merkezinä alındı hem erleştirildi çoktan beklenän rentgen aparadı, angısı diiştirdi bu günä kadar kullanılan hem artık dökülmää başlayan 30 yıılık eski aparadı.
TİKAnın yardımınnan alınan hem çalışmaya geçirilän bu rentgen aparadı verecek kolayını Çadır saalık Merkezindä taa üüsek uura kaldırmaa saalık izmetlerini, ani yapılêrlar Çadır rayonundan hem dolay erlerdän burada bakılan 64 bin insana.
2021-ci yılın Orak ayın (iyül) 16-da, rentgen aparadın çalışmaya başlamasınnan, Çadır saalık Merkezindä oldu ofițial bir țeromoniya, angısında, Merkezin vraçlarından hem izmetçi personalından kaarä, pay aldılar Türkiye Kişinev Büükelçisi Gürol SÖKMENSÜER, TİKA Kişinev programaların Koordinatoru Selda ÖZDENOĞLU, Gagauziya Komrat Başkonsulu Hasan AKDOĞAN, Gagauziyanın Başkanı İrina VLAH, Gagauziyanın saalıı koruma Upravleniyasının Başı Svetlana DULEVA, Çadır kasabasının primarı Anatoliy TOPAL.
