Kasımın 12-dä Komratta Gagauziya Halk Topluşu VII-ci toplumun kurucu toplantısı oldu, neredä eni seçilän deputatalar deputat kimniklerini kablettilär, Gagauziyaylan gagauz halkına izmet için emin verdilär, Bayraa öptülär hem Gagauziya Başkanın elleşärdilär. Sora da GHT Basını ayıramadılar.
Toplantı başladı Komrat Kultura binasının henez enilinmiş salonunda hem dramaturgiyanın kurallarına görä geçti: çeketmäk, intriga, kulminațiya hem senmäk. Çeketmäk isläädi sade ondan, ani 1 yıl hem 4 ay Gagauziya Halk Topluşuna basmayan Gagauziya Başkanı İrina VLAH bu kerä buyur ettilär kurucu toplantının açılışına gelmää hem deputatları “milleti sevmäk hem kahraman olmak” için nasaat vermää.
Yoktu nicä gülmemää ona, açan emin verärdilär o deputatlar, ani diil seftä ayırıldılar GHTya da orada gagauz halkına karşı zakonnar kabledärdilär, gagauz dilini kesärdilär hem gagauz uşaklarını aaç brakan bücetı kabledärdilär da şindi genä “halka izmet etmää” deyni emin verärdilär, sansın halkın üzünä türkürärdilär.
Emin vermektän hem bayrakları öpmektän sora deputatlar Gagauziya Başkanınan elleşärdilär. Sade iki deputat bunu yapmadı – İlya Uzun (Rus Köselisi) hem Sergey ÇİMPOEŞ (Tomay).
Deputat Nikolay DUDOGLU teklif etti toplantıyı kesmää, çünkü “4-5 deputat taa karar almamışlar kimin için oy vereceklär”. Bununnan deputatlar kayıl olmadılar.
Deputat kimniklerini kabletmäk hem emin vermäk gibi tantalalı işlerdän sora, urgulayarak, ani “Kultura binasının salonunda Gagauziya Başkanı tarafından hepsi kurulu ölä, ani deputatlar saklı oy verämesinnär deyni”, Sergey ÇİMPOEŞin teklifinä görä, deputatlar 23 oylan karar aldılar Gagauziya Halk Topluşun Başını hem onun yardımcılarını ayırmaa deyni, Başkannık binasının toplantı salonuna geçmää da hemen orayı taşındılar, ama Gagauziya Başkanı onnarlan bilä gelmedi. Burada soțialist deputatları 9 kişilik frakțiya kurmasını bildirdilär.
Bundan sora deputatlar büük şenniklän, şakalaşarak hem kendi-kendilerinä güleräk işlerini ilerttilär.
GHT Başını seçmää deyni esap komisiyası kuruldu. Gagauziya Halk Topluşun Başına iki kandidat teklif edildi – Dimitriy KONSTANTİNOV hem Viktor PETROV.
Deputatlar açıkladılar, ani seçim olacek zalda Gagauziya Başkanı tarafından saklı videokameralar koyulu da bu köstekleyecek deputatları. Neyä deputat Grigoriy DÜLGER teklif etti seçim kabinasının üstünü Gagauziya Bayraannan sermää.
Deputat Nikolay DUDOGLU açıkladı, ani seçimnerä katılmayacek. Kalan GHT deputatları oylarını kullandılar. Sonuç: Dimitriy KONSTANTİNOV için – 17 oy, Viktor PETROV için – 11 oy. 5 – bületen bozuk kabledildi (iki kandidat için da damga koyulmuş).
Nicä da beklärdik, Gagauziya Halk Topluşun kurucu toplantısı dramaturgiya janralarına görä geçti: başlayıp melodramadan, döndü tragediyeya da sonunda başarıldı büük bir farslan.
Aklınıza getireriz, ani GHT başı 18 oylan seçiler, onuştan bir kandidata 1 oy etişmedi.
Bununnan toplantı sendi, ama bitmedi, zerä şindi o bir oy için büük bir pazarlık başlayacek da o pazarlıın sonucunu Kasımın 16-dan görecez, açan deputatlar toplantıyı ilerledeceklär. Bakalım bu toplanrı angı toplantısı dramaturgiya janralarına görä geçecek?
