Komrat kasabasının Kultura evi meydanında Küçük ayın 21-dä geçti X-cu “Prost olmak” festivali, angısı bakılêr Büük oruca (Paskellä orucuna) girmää deyni hazırlanmakta Piinir aftasının son günündä.
“Prost olmak” festivalindä pay aldılar Komrat Kultura evin yaratmak kolektivları hem çok musaafirlär, ani bu yortuya geldilär.
Şen havalardan, oyunnardan hem türkülerdän kaarä, adetä görä, o günü masalar da kuruldu, neredä büük ikramnar vardı. Onnarın arasında, belliki, kıırmalar, akıtmalar, türlü tatlılıklar hem başka imeklär.
Festival şen hem meraklı geçti, doldurup insannarın cannarını sıcaklıklan hem taa bir kerä gözäl adetlerimizi dünneyä gösterdi.
