1990-cı yılın Harman ayın (avgust) 19-da, Kişinevdan hiç birinä sormadaan, Gagauz Halkın Üstolan Kongresi kurdu Gagauz Respublikasını hem 4 yıl onu korudu. Ama 1994-cü yılda Gagauz Respublikasının başında bulunan Stepan TOPAL hem Mihail KENDİGELÄN, tükürüp Kongresin Kararlarına, o Respublikayı sattılar da, dilenciyä verilän bir ekmek kurusu gibi, Kişinev kuvetlerinin bizä bir avtonomiya esabı atılan kuru ekmek kenarını kemirmää başladılar.
Açan sän kendinä saabi diilsin da yaşêêrsın onunnan, ne sana “saabilär” atêr, hazır ol, ani herbir kıpımda saabilär o atılan işleri, bir umursuz, geeri almaa saabidir.
Te şindi bu geeri almanın eşiinää geldik. O geeri almanın hazırlanması çoktan, taa 1994-cü yıldan beeri gider, ama tetää basmak 2022-ci yılın Harman ayın (avgust) 19-da Moldova Prezidentın binasının yanında yapıldı. Lafta “bilinmeyän kişilär mi, “bilinmeyän” partiyalar mı Prezidentın binasının auluna bu plakatı koydular, angısında romınca yazılı: “Bu toprakların saabileri olan Moldovannarın duşmannarının, Gagauziyanın avtonomiyasının yok edilmesini isteeriz. Bizim duşmannarımıza Moldova R. bücetından para başka vermeyin”.
Bu yazıların saabileri, maamilä surat bilinmäzmiş, sansın Prezidenturanın dolayında hiç bir videokamera yokmuş hem Prezidenturanın bekçileri uyuyarmış gibi.
Hadi bu onnarın esabına kalsın. Ama Harman ayın (avgust) 19-da Gagauz Respublikasının 32-ci yıldänümünü ölä tantalalı kutlayan Gagauziyanın Başkankası hem avtonomiyanın garantı İrina VLAH ne susêr? Neredä tumba gibi şiş Gagauziyanın Respublikasının “patriotların” sesi? Ne susêêrlar. Osaydı 2022-ci yılın Harman ayın (avgust) 19-da taa bir hayınnık mı oldu da avtonomiyay Moldova kuvetlerinä tabla üstündä mi sürdülär? Bir sürü cuvapsız soruş…
Akademik hem poet Todur ZANET, Gagauz Millli Gimnanın avtoru
