2018-ci yılın Orak ayın 15-dä, Türk halkının acısını paylaşarak, Gagauziyanın Çadır kasabasının primariyasının kararınnan hem Türkiye Türk İşbirlii hem Koordinaţiya Agenstvosu Başkannıın (TİKA) yardımınnan Çadırın “İzmit kardaşlık parkında”, 2016-cı yılın 15 Temmuz (Orak ayın (iyül) 15-şi) gecesi olan Türkiyedä devlet devrimi denemesinä karşı koymakta cannarını kurban verän 251 kahramanın hem yaralannanarın anması için bir anma taşı açıldı.
Bıldır TİKA tarafından bu anma taşı granitlän hem çimennän donadıldı da Türkiye Respublikasında bakılan “Demokratiya hem Milli Birlik Günü”ndä hepsi 251 raametli kahramanı anmaa deyni Çadıra geldiydilär Türkiye Kişinev Büükelçisi Gürol SÖKMENSÜER, TİKA Kişinev programaların Koordinatoru Selda ÖZDENOĞLU, Gagauziyanın büükleri, GHT deputatları, gagauz kultura hem bilim adamnarı, türk vatandaşları, Kongaz Süleyman DEMİREL teoretik liţeyin üürencileri hem üüredicileri.
Bu yıl sa, koronavirus pandemiyası beterinä, bölä bir anma kolaylıı olamadı. Ama Türk milletin “Demokrasi ve Milli Birlik Günü” yortusunda Türkiye Kişinev Büükelçilii hem TİKA Kişinev programaların Koordinatorluu, kendi adlarından, bu anma taşına şehitlerä saygı venokları koydurdular.
Bundan kaarä, nicä bildirdi TİKA Kişinev programaların Koordinatoru Selda ÖZDENOĞLU, Çadır primariyasının izininnän anma taşın dolayanı genişledip, Kişinev TİKA programaların Koordinatorluu anma taşın dolayına 251 şehitä 251 cannı gül ekti.
Anaktar sözlär : 15 Temmuz Şehitlerini Anmak Parkı, Çadır, TİKA
