2018-ci yılın Canavar ayın 18-dä Türkiye Prezidentı Sayın Recep Tayyip ERDOĞAN Gagauziyaya pek önemni hem faydalı bir vizitını sürprizdän başladı – Türkiye Prezidentı Komrata göklerdän vertolötlan indi, konup Komrat stadionuna.
Ozaman Canabisi gördüünän Gagauziyanın baş stadionun durumunu hemen karar aldı bu stadionu eniletmää hem ozaman hemen izin verdi Türkiye gençlär hem sport ministrusuna bu iş yapılsın.
Şindi stadionda hazırlık işleri başladı. İlkin eski stadionu yıktılar da temel için eri düzelttilär. Ama işlerin ilerlemesi için hem stadionun yapılması taa ucuz olsun deyni lääzım oldu Moldova Parlamentı alsın karar, ani burada kullanılan mallar için tamojnä vergileri olmayacek. Bu kararı parlament Ceviz ayın (sentäbri) 19-da aldı.
Ön açıklamalara görä Gagauziyanın baş stadionunun yapılması yaklaşık 5 milion evro para tutacek.
