Gagauziyanın başkasabasında COVİD-19-za şüpä altında bulunannara deyni maasuz hazırlanan bolnițada hastaları insancasına ilaçlamêêrlar, aaç hem susuz tutêrlar hem da vermerlär kolayını yıkansınnar da.
Çiçek ayın (aprel) 13-dä İnstagram resursunda peydalandı bu video https://www.instagram.com/p/B-90gGClwM-/?utm_source=ig_embed, neredä Baurçu küüyündän 30 yıllık üürediciyka, annadêr nicä onnarı doyurêrlar Komratta COVİD-19-za şüpä altında bulunannara deyni maasuz hazırlanan bolnițada. Vidiodan annadılêr, ani hastaları avşamneyin doyurêrlar makaronilärlän hem nesoysa bulaşık suylan. Bu videoyu Canabisi adladı Gagauziya Başkanına İrina VLAHa.
Taa sora bu videoyu yapan insan açıkladı nokta.md saytına, ani bolnițaya düştüynän 10 gün beklemiş koronavirusa testın sonuçlarını. Bu 10 gün içindä en şaşılacek iş olmuş, açan Canabisinä bolnițanın personalı, analizleri göstermedään, sölärmişlär ani onnar “pozitiv”. Ama 10 gündän sora, açan insanın elinä geçmiş analizlär listesi, o görmüş hererdä “negativ” (maavi renklän) yazıları, soradan da kırmızıylan “pozitiv” (kırmızı renklän) yazısını.
Analizlär gelmeyincä neylän hastaları ilaçlarmışlar, belli diil. Canabisi bildirdi, ani verärmişlär “askorbin” hem vitamin kopçalarını, hem ne sa taa, ama vraçlar o ilaçların adlarını açıklamarmışlar. Bu nedän ilaçlamak hem ilaçlamak mı?
Bu 10 günün içindä adamcilää onnarı doyurmamışlar da, – sadä suda yapılı kaşalar. İlk günnerdä içmää deyni verirmişlär krandan sarı burkut suyu. Yıkanmaa da gündä sadä 1,5 litra su verirmişlär. Sora, açan hastalar baarışmaa başlamışlar, onnara, yıkanmak için, başlamışlar vermää yarmışar kazan su. Ama duşta yıkanmaa kolaylık yokmuş. Bu gülmää almak diil mi?
Taa sora başlamışlar taa islää doyurmaa, verip mancalı kaşalar, lokma, kovricäk hem 1,5 litra (ama diil hergün!) şişelemä su.
Hastalar bulunêrlar 1 kişi palatada, ama onnara oradan çıkmaa brakmêêrlar. Palatada “kvarț” dezinfekțiyası yaparkan insannar kalêrlar içerdä, 30 minuda odeyalalarlan örtünüp.
Bu haberlerdän sora, Valkaneş kasabasından Gagauziya Halk Topluşu (GHT) deputatı Sergey ÇERNEY, televideniyada şaşılacek hem şoklu bir açıklama yaptı. Bu açıklamaya görä Gagauziya Başkanı İrina VLAH danışmış GHTya tekliflän kabletsinnär COVİD-19 salgınına karşı koymak için 34 milion 929 bin 910 leylik smetayı.
GHT deputatı sayêr, ani bu smeta 3-5 katına şişirmä bir smeta, angısının çoyu Gagauziyaya hiç diil lääzım da.
Örnek olarak Sergey ÇERNEY açıkladı bu smetanın kimi detallerini, angılarına görä, deycez “doktorlara koruyucu ekranı”ın birisi Moldovada 55 ley yapêr, bu smetada – 155 ley istener; ak ceerleri havalandırma aparatlar Türkiyedä 3 bin ABD doları yapêr, bu smetada – 20 bin Evro. Bu diil mi deriyi soymak?
Not. Bu günä kadar Baurçu küüyündän 30 yıllık üürediciykanın video danışmasına Gagauziya Başkanı İrina VLAH bir açıklama yapmadı, salt Çiçek ayın (aprelin) 15-dä bolnițada imäk yapan asçıykalar iştän atıldı.
