Hederlez ayın (may) 5-dä Gagauziya Başkanı İrina VLAH verdi izin kurmaa komisiya, angısı bakacek nicä korundu Gagauziyada başımıza tabiat belası yada üstolan durumu geldii zaman, insannarı aaçlıktan hem başka belalardan kurtarmak için boodaydan hem solärkadan kurulan devlet rezerva fondları. Bunu Canabisi yaptı Gagauziya İspolkomun büünkü toplantısında.
İrina VLAHın izininä görä Komisiya kurulacek Gagauziya İspolkomun azalarınnnan Gagauziya Halk Topluşun (GHT) deputatlarından hem bu komisiyaya devlet kuvetlerini korunan organnarı da girecek.
Bu konularlan ilgili açıklamalar Gagauziya İspolkomun toplantısında incelendi. Açıklamalara görä 01.05.2020 gününä kadar Gagauziyada rezervada 840 ton 868 kila booday var. Onnarın 621 ton 102 kilası bulunêr Kıpçak küüyün “Pobeda” kolhozunda, 219 ton 766 kilası da – Çadırdakı “Podiş Boyu” SRLsında.
Gagauziyada solärka rezervası – 37 ton, onnarın 32 tonu “Arnaut-Petrol”, 5 tonu da “Çadır-Petrol” Asoțiațiya Birliklerindä bulunêrlar.
Not. Çiçek ayın (aprel) 28-dä Gagauziya Halk Topluşun (GHT) XXXVI-cı toplantısında (28.04.2020), GHTnın çiftçilik dayma komisiyanın başı Nikolay DRAGAN açıkladı, ani Gagauziyada başımıza tabiat belası yada üstolan durumu geldii zaman, insannarı aaçlıktan hem başka belalardan kurtarmak için korunan 2.000 ton devlet rezerva boodayı kayıp olmuş (bak: http://anasozu.com/ortalik-patladi-gagauziyada-2-000-ton-devlet-rezerva-boodayi-nereyi-kayip-oldu/).
Patret: gagauzinfo.md
