Kasım ayın 9-da Komratta oldu Gagauziya öndercileri tarfından kurulan “Gagauz şarap yortusu”, ani erleşti hem geçti Komrat kasabasının baş meydanında.
“Gagauz şarap yortusu – 2024” günü razgeldi bir suuk, çii hem çiskin havaya, ama, buna bakmadaan, meydanda şennik sıraları hem şarap datmaları sürdü.
Komrat kasabanın baş meydanında bir fleşmob için bütün Gagauziyadan getirilän hem milli portulara giimni uşak ansamblileri taa erkendän meydanda diziliydilär. Havanın beterinä uşaklar üşüyärdilär. Onnarın çoyu kurtkalara hem çemberlerä sarılıydılar. Kimdä bunnar yoktu, yısınmak için biri-birinä sarmaşardılar ya da erindä oynamaa savaşardılar.
Hepsi “saadıçları” hem “saadıç koltıklarını” beklärdilär. Saadıçlar da – Gagauziya Başkankası hem Gagauziya Halk Topluşu Başı – 10:30-da meydanda peydalandılar. Ardlarında koltukları – Gagauziya İspolkom azaları, GHT deputatları hem taa ufak zaametçilär.
Meydandan geçip hem saada-solda duran insannarı selämnayıp, Gagauziya Başkankası Evgeniya GUȚULun hem GHT Başı Dimitriy KONSTANTİNOV sțenaya pindilär hem sora oradan insannara danıştılar. Kalanı aşaada, sțena yanında, kaldılar. Vardılar burada Türkiye Gagauziya Komrat Başkonsulu Adnan HAYAL hem Moldovada Rusiya Büükelçisi Oleg OZEROV da.
Meydanda sa 20 minutluk bir gösteri başladı. İlktän oradan “kırcıları” hem “baa bozmasına” gidän insannar sürüsü geçti, ardına da “Düz Ava” ansamblisinin oyuncuları üzümcülüklän hem şarapçılıklan ilgili uzun bir oyun oynadılar. Gösteri başarıldı hepsi uşak ansamblilerin fleşmobunnan.
Şarapçıları çeşitli nominațiyalarda kutladıktan sora, “Gagauz şarap yortusu – 2024” sırasının haliz şennikleri başladı: aulları gezmäk, şarap buyurmak, gagauz milli imeklerindän datmak, fotosesiyalar hem oyunnar, el ustaların mallarınnan tanışmak hem onnarın alış-verişi.
Başarıldı “Gagauz şarap yortusu – 2024” sırası büük bir konțertlän, angısında pay aldılar Gagauziyadan hem aşırıdan anılmış artistlar.
