Küçük ayın (fevral) 20-dä Moldova premyer-ministrusu Dorin REÇEAN ofițial vizitlän Gagauziyanın Valkaneş dolayında hem kasabasında bulundu, neredä Valkaneş-Kişinev elektrika stanțiyasının enilinmesinnän tanıştı, Kişinev-Komrat-Curculeşti M3 yolun düzülmesini baktı hem Valkaneş kasabasının primariyasında bir toplantıya katıldı.
Bu vizitlän ilgili Moldova pravitelstvosunun saytında haberlerdä hem basın açıklamalarında Gagauziya lafı kullanılmêêr, ama sadece “Valkaneş rayonu” hem “üülen regionu” terminneri var, sansın Valkaneş Gagauziya diilmiş hem Gagauziya hiç yokmuş ta.
Bu saygısızlık görüner ondan da, ani Valkaneş primariyasında olan toplantıda, neredä pay aldılar Gagauziyada seçilän erindeki kuvetlär azaları hem Gagauziyadan “Satul European” programasında pay alannar, Moldova Bayraanın yanında Gagauziya Bayraa yoktu, ama Evropa Birliin bayraa durardı.
Toplantıyı hazırlayan vaşkaneşlilär hem Moldova pravitelstvosu bunu “protokol sırasınnan ilgili” olarak yapılmasını açıkladılar.
İlkin bu saygısızlaa karşı çıktı Gagauziyanın Başkankası Evgeniya GUȚUL, angısı açıkladı, ani “Kişinev hem PASlan işbirliindä olan kollaborantlar vazgeçmeerlär cümnenin önündä Gagauziyayı aaşaltmaa”. Canabisi açıkladı, ani pek canı acıyêr ona, ani “buluşmada yoktu bir da adam, ani karşı koysun Gagauziya Bayraanın ortadan kaldırılmasına hem avtonomiyanın simvollarının çinenmesinä”.
Gagauziya Halk Topluşun Başı Dimitriy KONSTANTİNOV sa urguladı: “Moldovanın Bayraanın yanında Gagauziya Bayraana er olmadı. Biz taa diiliz Evropada. Ama Evropada olarsak, ozaman bizim Bayramız orada hiç olmayacek ta. Bu büük bir yumuruk bütün Gagauziyaya”.
Ama Komrat kasabasının primarı Sergey ANASTASOV hem taa birkaç Gagauziyadan primar pay tuttular Nikolay POSMAKtan.
Ortalık kızıştıynan, Valkaneş primarı Nikolay POSMAK açıkladı, ani Gagauziya Bayraanı salondan o çıkarmamış, çünkü salonu bu toplantı için primariya Gagauziyada Moldova pravitelstvosunun temsilciinä kiraya vermiş da Bayraa onun temsilcisi Sergey ÇERNEV salondan çıkarmış. Nicä dä olsa, Gagauziya Bayraa oradan atılmıştı.
Herliim büün, 30 yıldan sora, Gagauziya avtonomiyası varsa hem 1994-cü yılın Kırım ayın (dekabri) 23-dä Moldova Parlamentı tarafından kabledilän “Gagauziya (Gagauz Yeri) özel hak statusu” Zakonu taa yaşarsa, ozaman Bayraamız da yaşêêr hem ona hererdä saygı lääzım olsun…
Belli ki, saygı sana var açan sän kendini sayêrsın. Kim ne istärsä desin, ama devlet varkana o devlettä hepsinä saygı lääzım olsun, diil salt nestä izmetçilerinä.
Örnek için burada Gagauziyanın 25 yıldönümünü Kişinevda devlet tarafından bakılan zamandan Gagauziyaya saygı patretleri dä tiprlêêrız.
Patretlär: Moldova pravitelstvosunun facebook sayfasından, İgor Dodon facebook sayfasından
