ginastika_italiya (1)

02.06.2025, tarafından yazılı , CÜMNE, SPORT BÖLÜMÜ, 3251 KERÄ BAKILMIŞ

Moldovaylan Gagauziya bayraklarını üüseklerä kaldırdılar

Hederlez ayın 22-25 günnerindä İtaliyanın Komo kasabasında geçti Evropa sport tanțları çempiomatı, neredä pay aldılar Gagauziyanın Komrat kasabasının Munițipiy Sport Şkolasının (MSŞ) akrobatika hem gimnastika bölümünün sportsmenkaları.

Bu Evropa çempionatına Komrat kasabasının Munițipiy Sport Şkolasının (MSŞ) yolladı 3 kişilik komandayı, angısında vardılar Elizaveta POLOVKOVA, Kira PLUKÇİ hem Valeriya GAYDARCI.

Nicä bildirdi MSŞ akrobatika hem gimnastika bölümün trenerı Alöna JUNEA, Gagauziya sportsmenkaları bu çempionata deyni hazırladılar 5 nomer bu kategoriyalara deyni: acro dance solo (8-10 yaş arası için), fit kid solo (9 yaş için), acro dance youth (13-15 yaş arası için).

Bizim gimnastkalar bu çempionatta kendilerini bölä gösterdilär:

Kira PLUKÇİ – acro dance solo kategoriyasında 24 katılımcının arasında 1-ci hem fit kid solo10 katılımcının arasında 2-ci oldu.

Üçlü tanțlarda Valeriya GAYDARCI – Elizaveta POLOVKOVA – Kira PLUKÇİ acro dance kategoriyasında 1-ci eri aldılar.

Valeriya GAYDARCIda hem Elizaveta POLOVKOVAda da solo nomerleri vardı, ama, yazık, ani onnar bu uurda ödüllü erleri alamadılar.

Esabı yaparak, urgulêêrız, ani Komrat kasabasının Munițipiy Sport Şkolasının (MSŞ) akrobatika hem gimnastika bölümünün sportsmenkaları, Moldovaylan Gagauziya bayraklarını üüseklerä kaldırarak hem Çehiya, Germaniya, ya, İtaliya, Polşa, Poyraz Kipra, Slovakiya hem Vengriya komandalarını arda brakarak, bu Evropa çempionatında pek üüsek sonuçları gösterdilär.
ginastika_italiya (2) ginastika_italiya (5)

BİR CUVAP YAZIN