2025-ci yılın Harman ayın (avgust) 5-dä Kişinev Boyukan sudun daavacıykası Anna KUÇERESKU, aldı karar Gagauziya Başkankasına Evgeniya GUȚULa 7 yıl kapan vermää.
Boyukan sudun daavacıykası Anna KUÇERESKU kararında açıkladı, ani “Evgeniya GUȚULa 7 yıl kapan veriler o üzerä, ki 2021-2022 yıllarda, şindi Moldovada zapa altına koyulan, “ŞOR” partiyasında işleyeräk, bu partiyayı hem seçimnär konkurentını zakonsuz finans etmesindä o ortaklık yapmış”. Bundan kaarä Canabisini kabaatlı bulêrlar 2022 yılın Canavar-Kasım aylarında “ŞOR” partiyasının kimi rayon bölümnerin işlerindä koordinațiya yapmasında.
Hep bu kararlan o yıllarda “ŞOR” partiyasının sekretarinä Svetlana POPANa 6 yıl kapan verildi.
Evgeniya GUȚUL bu işlerdä kendisini kabaatlı bulmêêr.
Sudtan sora kendi advokatları aracılıınnan yapılan bildiridä Gagauziya Başkankası Evgeniya GUȚUL açıkladı: “Bu farsı bän kabletmeerim hem kendi adım, onurum hem dä dooruluk için düüşecäm. Yıkılmayacam. Mutlaka kendi halkıma dönecäm! Uşaklarıma dönecäm! Aylemä dönecäm! Bu kararı biz kesinniklän üst instanțiyalarda protesto edecez hem dooruluu kazanacez”.
Sudta alınan karardan sora, Gagauziya Başkankasının advokatı Sercu MORARU aşıkladı, ani karar “dışardan gelän izinni” hem “politikalı faktorlu” bir karar. O urguladı, ani bu kararı, kesinniklän, Apeläțiya Palatasına protesto edeceklär.
