Memlekettä olan bıldırkı, hem taa çok buyılkı, kuraklıın beterinä Gagauziyada göllär hem tıynaklar ya heptän, ya da 80-90% kadar kurudu.
Gagauziyanın çiftçilik industriyası Upravleniyası açıkladı, ani, gidrologiya kuraklıı beterinä, Gagauziyada 99 göldän hem tıynaktak 43-çü kurudu. Belliki, bu kurumaklan oraları balıksız da kaldı. Heptän su bittii Baurçu, Çok Maydan, Kıpçak, Kongaz, Kongazçık, Rus Köselisi göllerindä. Bundan kaarä komşu küülerinin Korten, Salçiya hem Valä Perjey gölleri da heptän kurudular.
Kuraklık hem aşırı sırada üüsek sıcaklık üzerinä hem dä suda kislorod iisiklii ya da hiç olmaması beterinä, Moldovanın 4 gölündä “balık ölümü” kıyameti da oldu.
Örnek olarak, Gagauziyanın Beşalma küüyün gölündä 20 tondan zeedä büük balıklar bunaldı hem öldü. Onnarın arasında taa çoyu 5-20 kilalık sazannar, tolstolobiklär hem sudak balıkları.
Hepsi bu ölü balıklar gölün kiracısının hem ona dost olan balıkçıların zaametinnän toplanıldı hem maasuz erdä gömüldü. Bu verdi kolayını ekologiya karastrofasını önnemää.
