Ceviz ayın (sentäbri) 17-dä Gagauziya Başkankası Evgeniya GUȚULun halklararası advokatlar komandası bir pres-konferențiya yaptılar, neredä urgularılar, ani “insan hakları aktivistlerinä görä, var nicä şüpelenmää, ki Evgeniya GUȚULun daavası politika harakterını taşıyêr.
Gagauziya Başkankası Evgeniya GUȚULun halklararası advokatlar komandasında ortak işleyän anılmış evropalı advokatlar William JULİÊ (Franțiya) hem Gonzalo BOYE (İspaniya) hem da moldovalı advokatlar Sergey MORARU hem Nataliya BAYRAM Kişinevda ortak pres-konferențiya yaptılar.
Pres-konferențiyada advokatlar açıkladılar, ani “var çok şüpelär, ani Evgeniya GUȚULun daavası politika harakterını taşıyêr”.
William JULİÊ urguladı, ani “onnara verildi sade 2 afta, ani Evgeniya GUȚULun 16 bin sayfadan zeedä oluşan 67 tomnuk ceza işini incelemää deyni. Bu pek az, ama eter, ki annamaa, ani orada var moldovalı zakonnarın, evropalı hem galklararası insan hakların türlü basmaları. Onnarın arasında – kabaatsızlık prezumțiyasının ezilmesi, dooru daavacılık işinä hakkı, sud sistemasının tarafsızlıı hem baamsızlıı, keyfi tutuklama hem politikalı diskriminațiya zapalanması hem fikir serbestlii hakkı”. Canabisi urguladı, ani marturların çoyu suda çaarılmamış.
Nicä biliner, Gagauziya Başkankasına Evgeniya GUȚULa “prestupnik grupasından zakon dışı finans kabledilmesi için” (söz gider Moldovada zapa altına koyulan “ŞOR” partiyası için) 7 yıl kapan vermää kararı Harman ayın (avgust) 5-dä aldı Kişinev Boyukan sudun daavacıykası Anna KUÇERESKU. Bu karardan sora Evgeniya GUȚULu hemen bukaaladılar da Kişinevun №13 kapanına alındı. O gündän beri, bu karar hem bu kapamaya karşı protest olarak, Kişinevun №13 kapanın önündä, Gagauziya Başkankasını Evgeniya GUȚULu hem onunnan bilä kapanan Svetlana POPANı (zapa altına koyulan “ŞOR” partiyasının sekretari, angısına daavacıykanın hep o kararınnan 6 yıl kapan verildi – “AS” nışanı) serbest brakılması için durmamayca protest mitingları geçer.
Not. Gagauziya Başkankası Evgeniya GUȚUL 2025-ci yılın Baba Marta ayın 25-dä Kişinev aeroportunda Moldovanın antikorupțiya Merkezi (CNA) tarafından tutuklandı.
