Hederlez ayın (may) 6-da gagauzlar kutladılar en büük hem maanalı milli yortulardan birisi – Hederlez yortusunu, ani “Canavar yortuları”nan hem “Kasım” yortumuzlan bilä bizä dedelerimizdän kaldı.
Hederlez yortusunun baş kutlamaları “Gagauziyada Hederlez – 2026”, Gagauziya kultura Upravleniyasının çalışmasınnan hem İspolkom kuruluşların yardımınnan, 13-cü Hederlez şenniklerinnän Çadırdakı “At-prolin” tamazlık at fermasının ipodromunda oldu.
Bu şenniklerin ana sırası başladı “Düz Ava” türkü hem oyun halk ansamblisinin hem Çadır “Dionis TANASOGLU” adına Gagauz Milli teatrusunun hazırladıı teatrulu gösterisinnän hem oyunnarınnan hem bütün Gagauziyadan katılan uşak ansamblilerin bir büük fleşmobunnan, angıları muzıka hem gagauz halk oyunnarınnan annattılar gagauz halkın geçmişini, ruhunu hem adetlerini.
“Gagauziyada Hederlez – 2026” şenniklerin ofițial açılışını yaparak, Gagauziya İspolkomu Predsedatelin yardımcısı İlya UZUN okudu yortuda bulunannara Gagauziya Başkankası Evgeniya GUȚULun kutlama mesajını. Sora Gagauziya Halk Topluşun geçici Başı Nikolay ORMANCI insannara kutlamak nasaatınnan danıştı.
Bu nasaatlardan sora da, Gagauziyanın anılmış artistleri hem artistkaları Sergey İVANOV, Olga PAÇİ, Yuliya ARNAUT hem İvan BABOV Hederlezin ofițial gimnasını – “Gagauziyada Hederlez” (laflar –Todur ZANET, muzıka –İliya FİLEV) çalarak, Hederlez yortusunun kutlamalarına yortulu üüseklii verdilär.
Halizdän kutlamalar taa sabaalendän başladı. Master-klaslardan kaarä, yortuya gelän musaafirlerä deyni halk ustaların çarşısı açıldı hem milli imeklär datmaları kolaylıı verildi, sport, şennik hem gagauz oyunnarı meydancıkları kuruldu. Büüklär dä, küçüklär dä vardı nicä kendilerini denesinnär “Güreş”, “Baaşış tekerlää”, “Pekarcık”, “Aaçta güreş”, “Beşka” hem “Çatıyı atla” yarışmalarında.
Bundan kaarä yortulu kutlamada “Unudulmuş adetlär” konkursları da yapıldı, neredä katılannar vardı nicä kendilerini denesinnär dedelerimizin eski yarışmalarında – kamçıyı patlatmakta, diirennän saman çuvallarını atmakta, aar kaldırmakta.
Hederlez yortusunda kendi aullarını kuran Aydar, Baş küüyü (Kirsova), Baurçu, Beşgöz, Çadır, Kıpçak, Komrat, Kongaz, Kongazçık, Svetlıy hem Tomay primariyaları ikram ettilär musaafirleri gagauz milli imeklerinnän hem katıldılar “Kurban bulguru” konkursuna, angısında ensedi Çadır kasabasının bulguru.
Belliki, “Gagauziyada Hederlez – 2026” şenniklerin baş olayı oldu At yarışmaları hem eşeklerdä koşmaklar.
Hederlez yortumuz kutluca olsun!
