Kirez ayın 3-dä Gagauziya Halk Topluşun sıradakı toplantısında Gagauziya başkanına Mihail FORMUZALa hem Halk Topluşun başına Dimitriy KONSTANTİNOVa urdular.
Kirez ayın (iyün) 3-dä Gagauziya Halk Topluşu kendi sıradakı toplantısına toplandı. Zalda vardılar may hepsi deputatlar, İspolkom azaları. Prezidiumda oturardılar Gagauziya başkanı Mihail FORMUZAL, Halk Topluşun başı Dimitriy KONSTANTİNOV hem Halk Topluşu başın yardımcıları Demyan KARASENİ hem Aleksandr TARNAVSKİY.
Tribunada GHTnın bücet komisiyanın başı Grigoriy MARAR kendi nasaatını başararkan kabaat attı GHT başına, ani o sade kendi işlerinä bakêr, da teklif etti Dimitriy KONSTANTİNOV hem onunnan kalan GHT prezidiumun azaları zayavleniya yazsınnar da atılsınnar kendi erlerindän.
Dimitriy KONSTANTİNOV bununnan kayıl olmadı. Zaldan Dimitriy KONSTANTİNOVun adına işidildi laflar: “Yalancı!” Birazdana prezidiuma yaklaştı Vaşkaneş rayonun başı Sergey ÇERNEV da birkaç kerä baardı: «Заявление на стол!» Dimitriy KONSTANTİNOV kayıl olmadı zayavleniye yazmaa. Ozaman Sergey ÇERNEV pindi masa üstünä da Halk Topluşu başına Dimitriy KONSTANTİNOVun üzünä bir şamar çekti. Hem deerlär, ani Sergey ÇERNEV urmuş bir tepmä Mihail FORMUZALa da.
Bildiriler, ani zavalı Mihail FORMUZALa hem Dimitriy KONSTANTİNOVa deyni doktorların yardımı lääzım olmuş da onnara “Skorıyı” çaarmışlar. Doktorlar bu konuda bir açıklama yapmadılar.
Kavgadan hem düüştän sora presayı zala kolvermedilär. Toplantı biraz kapalı kapular ardında sürttü. Sora da deputatlar daaldılar.
Not. Gagauziyanın poliţiyası bildirdi, ani bu olaylan ilgili “ceza işi” açmış. Zakona görä kabaatlılar ya 18 bin ley ödeyeceklär, yada 5 yıl kapan yapaceklar.
