Kırım ayın (dekabri) 3-dä Tomayın, Çadırın “Mihail GUBOGLU” adına hem Avdarmanın “Dimitriy ÇELENGİR” liţeyleindä gösterildi eski gagauz oyunnarı, angılarını evelki zamannarda oynarmışar küçük kızlar hem çocuklar hem da delikannılar.
Bu oyunnarın arasında uşaklar aklılarına getirdilär hem oynadılar oyunnarı: “Aşık”, “Basmacık”, “Boba topu”, “Boldur”, “Borç”, “Boyacı”,”Büülü iplicäk”, “Çelik”, “Dadacık”, “Daullan, zurnaylan”, “Fırıncı”, “Kopça”, “Saklambaç” yada “Yumancak”, “Uzun eşek”, “Üzücäk” hem başka.
Oyunnara katılannar hepsi geldilär bir fikirä, ani bu oyunnar diil lääzım unudulsun, neçin deyni şindiki zamanda uşakların vakıdını alêr hem iyer eni tehnologiyalar: telefonnar, kompyuterlär, planşetlar da bu iş onnarın saalıına büük zarar verer.
Üüredicilerä hem üürencilerä deyni bu oyunnarı hazırlamaa pek faydalı oldu Todur ZANETin “GAGAUZLUK: Kultura, Ruh, Adetlär” kiyadı, neredä o oyunnnarın çoyu yazılı hem açıklı.
PATRETLERDÄ: “Kopça” oyununu Tomay liţeyin üürencileri oynêêrlar.
Avdarma “D. Çelengir” liţeylein “Uzun eşää”.
Not. Hepsi liţeylerdä oyunnarı videoya çıkardılar Türkiyenin Eskişehir kasabasının Osman Gazi universitetından aaraştırmacılar.
