2009-cu yılda alındı karar, ani gagauz yazısı Gününü yaz vakıdından Çiçek ayın (aprel) 27-nä, büük aydınnadıcımızın Mihail ÇAKİRin duuma gününä, almaa. Onuştan bu günä karşı Ana Dilimizlän hem literaturamızlan ilgili türlü meropriyatiyalar yapêrız. Zerä Ana Dili bu milletin canı, onun genetika kodu, onuştan onun korumasına, yaşamasına hem yaşatmasına lääzım çok çalışalım.
Caltay küüyün «Золотой ключик» (“Altın anaktar”) uşak başçasında, başlayıp Çiçek ayın (aprel) 1-dän taa 27-dän, Gagauziyanın Üüredicilik upravleniyasının programasına görä, Gagauz yazısına baaşlanan meropriyatiyalar yapılêr. Ölä Çiçek ayın (aprel) 5-dä burada oldu buluşmak gagauz poetınnan hem yazıcısınnan, gagauz Milli Gimnın avtorunnan, akademik Todur ZANETlän. Bu buluşmak taa ilerdän planımıza koyulduydu.
Buluşmada Todur İvanoviç becerdi uşakların havezini kendi üstünä çevirmää da geçirdi onnarlan pek meraklı hem aktiv bir buluşmayı. Uşaklar havezlän seslärdilär Canabisini, kendileri da gagauz poetların peetlerini okudular, bilmeycelerä cuvap verdilär, pek gözäl gagauz dilindä lafedärdilär. Fizminutkayı da musaafirimiz uşaklarlan gagauz dilindä yaptı. Uşaklar koyardılar musaafirimizä soruş, angılarına Canabisi uşaklara annaşılan bir dillän cuvap verdi. Bitkidä uşaklar, uşak başçasının direktoru hem çalışannarı Todur İvanoviçlän bilä patredä çıktılar.
Buluşmadan sora Canabisi uşak başçamızda kısa bir ekskursiya yaptı, cuvap vereräk pedagoglarda peydalanan soruşlara.
Hem küçüklär da, hem büüklär da pek kanaat kaldılar bu buluşmadan. O getirdi bizä büük fayda, biz çok eniliklär üürendik Ana Dilimiz için. Saa olsun Todur İvanoviç, ani saymadı zaametini da geldi uşak başçamızda bu buluşmaya, dileriz Canabisinä onun çok kertikli yaratmak uurunda başarılar.
Elena Nikolevna STANEVA, Caltay küüyün «Золотой ключик» (“Altın anaktar”) uşak başçasının başı
