Harman ayın (avgust) 25-dä Kişinevda, Türkiye Kişinev Büükelçiliin önündä, Türkiye Respublikasının kurucusunun Mustafa Kemal ATATÜRKün byustu açıldı.
Mustafa Kemal ATATÜRKün byustun yortulu açılışına geldilär Moldovada türk işadamnarı, Moldova devlet insannarı, diplomatlar, kultura hem incäzanaat adamnarı, cümne insannarı, jurnalistlär.
Açılışta selemnama sözünnän insannara danıştı Türkiye Kişinev Büükelçisi Mehmet Selim KARTAL, nedän sora Canabisi teklif etti bir minutluk susmaklan anmaa hepsi şehitleri. Nedän sora da Moldova içişleri ministerliin duhovoy orkestrası çaldı Moldovanın hem Türkiyenin gimnalarını da, bu zamanda, Büüklçilik binasının önündä iki devletin bayrakları kaldırıldı.
Sözünü ilerledäk Türkiye Kişinev Büükelçisi Mehmet Selim KARTAL kısadan annattı Mustafa Kemal ATATÜRKün yaşamasını, onun Türkiye Respublikasını kurması için hem o önemni adımnar için, ani ATATÜRK yaptı Türkiyeyi üüseltmää deyni.
Moldova tarafından söz tuttu Moldova kultura ministrusu Monika BABUK.
Sora Mustafa Kemal ATATÜRKün byustun ofiţial açılışı oldu. Byustu örtän Türkiye Bayraanı baalayan şiritleri kestilär hem byustu birliktä açtılar Büükelçi Mehmet Selim KARTAL hem Canabisinin eşi Banu Cankan KARTAL hem da Moldova kultura ministrusu Monika BABUK.
Byusttan Türkiye Bayraa kaldırıldıynan hepsi mayıl oldular o byustun gözelliinä hem okudular iki dildä yazıları:
MUSTAFA KEMAL
ATATÜRK
TÜRKİYE
CUMHURİYETİNİN
KURUCUSU
FONDATORUL
REPUBLICII TURCIA
1881 – 193∞
YURTTA BARIŞ, DÜNYADA BARIŞ
PACE ÎN ŢARĂ, PACE ÎN LUME
Nedän sora eni açılan Mustafa Kemal ATATÜRKün byustuna çiçeklär koyuldu.
Mustafa Kemal ATATÜRKün ölüm yılının erinä sonsuzluk simvolun “∞” koyulması gösterer, onu, ani Mustafa Kemal ATATÜRK ölmedi – o daymaların-daymalarında yaşêêr hem yaşayacek.
Akademik Todur ZANET
