Canavar ayın (oktäbri) 31-dä, büük remonttan sora, Kongaz Süleyman DEMİREL liţeyi kapularını taa da geniş açtı. Remontu TİKA yolunnan Türkiye Respublikası yapıtı.
Türkiye Respublikasının 93-cü yıldönümünä baaşlanan Süleyman DEMİREL liţeyi remonttan sora ofiţial açılışında pay aldılar Moldova Türkiye Büükelçisi sayın Hulusi KILIÇ hem Canabisinin eşi Günay KILIÇ hanum-efendi, Gagauziya Başkanı İrina VLAH hem Gagauziya Halk Topluşu Başı Dimitriy KONSTANTİNOV, TİKA Kişinev Kordinatoru Canan ALPASLAN, Gagauziya üüredicilik Upravleniyanın başı Sofya TORLAK, Kongazın primarı Mihail ESİR, Akademik hem yazıcı Todur ZANET, devlet hem cümne insannarı.
Nicä, sükür ederäk, bildirdi Kongaz Süleyman DEMİREL liţeyin direktoru Funda TÜFEKÇİ, Tika yardımınnan liţeydä büük bir remont yapıldı: diişildi örtü, pençerelär hem kapular, odalar enidän suvandı hem boyandı, enilendi imek yapmak tertipleri hem liţeyin konaanda remont yapıldı. Gagauziya İspolkomun yardımınnan kotelnıya deyni eni kotöllar alındı.
Açılış sırası yortusunda ev saabilerin hem musaafirlerin nasaatlarından sora, paalı musaafirlerä deyni liţeyin üürencileri kısa, ama pek gözäl bir konţert programası gösterdilär: türk, gagauz hem moldovan oyunnarı oynandı, türkülär çalındı.
Bitkidä ev saabileri ikram ettilär musaafirleri datlı türk hem gagauz milli imeklerinnän, ani pişirilmiştilär eni tertiplerdä.
Not. Kongaz Süleyman DEMİREL liţeyi açıldı 1999-cu yılda. Burada üürenerlär hem kızlar hem da çocuklar. Büünkü gündä onnarın sayısı 129 üürenci.
