2018-ci yılın Hederlez ayın 17-20 günnerindä Rusiyanın Sankt-Peterburg kasabasında geçer XIII-ci Halklararası kiyat Salonu. Bu Salonda pay alêrlar 20 devlettän hem Rusiyanın 150 regionundan zeedä kiyatçılar hem temsilcilär, bildirer Rusiyanın TASS haber agenstvosu.
XIII-ci Halklararası kiyat Salonuda kendi sergisini Gagauziya da kurdu. Bu sergidä var 100-dän zeedä kiyat. Onnarın arasında bilim hem din kiyatları, gagauz yazıcıların hem poetların toplumnarı, etnografiya hem taraf albomnarı, CD disklar hem başka.
Hederlez ayın 18-dä, Salonun ofiţial açılışından sora, Gagauziyanın sergisinä uurudu Sankt-Peterburg gubernatoru Georgiy POLTAVÇENKO, angısını karşladılar Gagauziya İspolkom predsedatelin yardımcısı Olesä TANASOGLU hem serginin başı, genç poetesa Elena MOKANU.
Olesä TANASOGLU şükür etti Sankt-Peterburg gubernatoruna, ani onun “yardımınnan iki yılın içindä Gagauziyanın bibliotekalarına Rusiyadan 12 bindän zeedä kiyat geldi. Onnarın arasında, belliki, en önemnisi oldu o, ani Sankt-Peterburgta tiparlandı gagauz aydınnadıcısının Mihail ÇAKİRin tarafınan gagauzçaya çevirilän “Evangeliya”.
XIII-ci Halklararası kiyat Salonu çalışmasını bitirdiktän sora, Gagauziyanın sergisindä bulunan kiyatlar baaşlanaceklar Sankt-Peterburgun bir bibliotekasına.
Tatyana DRAGNEVA, ULIMın studentkası
