Gagauziya Başkanın teklifinä görä Rusiyanın Sankt-Peterburg pravitelstvosu verdi para tiparlamaa deyni gagauzların geniyinin raametli resimcinin Dimitriy SAVASTİNın Albom-kiyadını – “Gagauz resimcisi Dimitriy SAVASTİN”, ani üç dildä hazırlandı: gagauzça, rusça hem angliyca.
Sankt-Peterburg pravitelstvosunun Basım hem mas-mediyaylan işlişkileri Komitetın başı Sergey SEREZLEV götürdü orada bulunan Gagauziya İspolkom predsedatelin yardımcısını Olesä TANASOGLUyu o tipografiyaya, neredä hazırlanêrlar tipalamaa “Gagauz resimcisi Dimitriy SAVASTİN” Albom-kiyadı da gösterdi ona kiyadın maketını hem denemä baskısını.
Sergey SEREZLEV açıkladı, ani Albom-kiyat üüsek kalitedä olsun deyni, oonnar durmamyca kontaktta bulunêrlar resimcinin oolunnan Sergey SAVASTİNnan.
Albom-kiyadında var 332 sayfa hem karar alındı onu basmaa kalın melovanıj kiyatta. Tirajı olacek 500 taanä.
