Harman ayın (avgust) 27-dä, Gagauziyanın Çadır rayonun Aydar küüyün Kurbanında burada V-ci “GagauzKilimneri” Festivali geçti. Bu yıl Festivaldä pay aldılar insannar Gagauziyanın hem Ukraynanın küülerindän hem kasabalarıdan: Aydar, Baurçu, Beşgöz, Çadır, Komrat, Kurtçu, (Ukrayna), Valea-Perjey (Moldovanın Taraklı rayonu).
Festivaldä sergilendi kilimnär, niţurkalar, palalar, çiizlär (peşkir, yorgan-döşek, yastık, ramkalar, çotra peşkirleri h.t.b.), el ustaların malları, gagauz halk imekleri, patretlär.
“Gagauz kilimneri” Festivali başladı ondan, ani festivalcilär taligalarda yaptılar bir gezi küü içindä. Sora onnara “Gagauz kilimneri” Festivali eri girişndä tuz-ekmeklän karşladılar küüyün primarı İlya KÖSÄ hem küülülär.
Festivalin günü düştü Büük Panayıya yortusuna karşı (Harman ayın 28-zi, bu gündä Aydar küüyün Kisä Kurbanı), onuştan onu başladılar küüyün en büük (92 yaşında) küçük yaşta (altı aylık) Mariyaların kutlamasından. Sora baaşışlar verildi en çok yıl evli olan çiftlerä.
Kutlama sözlerinnän aydarlılara hem Festivalin musaafirlerinä danıştılar Aydar küüyün primarı İlya KÖSÄ, Gagauziyanın kultura hem turizma Upravleniyanın başı Marina SEMENOVA, Gagauziyanın bilim-aaraştırma Merkezin başı Pötr PAŞALI.
Festivalin açılışından sora, jüri azaları tanıştılar kilimnärlän hem başka sergilärlän da kendi kararını insan önündä bildirdilär.
V-ci “Gagauz kilimneri” Festivali “Gran-Pri” diploması hem baaşışı verildi Çadırdan Alina MİHALKİNAya.
Büük kilimnär için çeşitli nominaţiyalarda ödülülleri aldılar: “Evelki kilim” – Mariya KAMBUR (Beşgöz küüyü); “Halklar dostluu kilimi” – Olga KULAKSIZ (Kurtçu küüyü, Ukrayna); “Milli renklär (kolorit)” – Aleksandra MACAR (Aydar küüyü); “Büünkü ornament” – Nina KAPSAMUN (Aydar küüyü).
Suvinir kilimcikleri için ödülülleri aldılar: İlya BEJENR (Komrat kasabası), Elena ÇEBAN (Aydar küüyü), İvan KIRIM (Beşalma küüyü), Dimitriy MANASTIRLI (Çadır kasabası).
V-ci “Gagauz kilimneri” Festivalin en evelki kilimneri oldular 1920-ci yıldan kilim (sergiledi Valea-Perjey küüyündän Nikolay STOEV) hem 1925-ci yıldan kilim (sergiledi Beşalma küüyündän İvan KIRIM).
İsteyennär vardı nicä burada tanışsınar kilim hem pala dokuma tehnologiyasınnan.
Festivalä katılannara deyni o günü 2 turist marşrutu hazırlandı hem başarıldı Festival bir konţertlän.
