Türkiyeyä yaptıı vizitı zamanı Gagauziya Başkankası Evgeniya GUȚUL açıkladı, ani neetindä var Ankarada Gagauziyanın temsilciliini açmaa. Bunu Canabisi söledi AA agenstvosuna (Anadolu Agenstvosu) intervyuda.
Evgeniya GUȚUL söledi, ani, Ankaradan kaarä, Moskvada da Gagauziyanın alış-veriş temsilciliinin açılması neetindä var.
Bu açıklamaları yaparak, Evgeniya GUȚUL bildirdi, ani Gagauziya isteer bu temsilcilikleri açmaa o üzerä, ani, hem Türkiyedä, hem da Rusiyada çok gagauz yaşêêr hem bu iki devletlän Gagauziyanın derin ekonomika hem alış-veriş baaları var.
Gagauziya Başkankası sayêr, ani bu temsilciliklerin açılması verecek kolayını Gagauziyaya investițiyaları hem Türkiye investorlarını çekmää.
Buna karşı Kişinev kuvetleri, parmaanı sallayarak, hemen kalktılar, söleyeräk, ani Gagauziyada bölä bir hakk yok hem dış ilişkileri sadecä Moldova devletin hakkıdı.
