Gagauziyanın Baurçu küüyün gimnaziyasının kurulmasının 35 yıldönümünnän ilgili olarak, bu üüredicilik kuruluşunda oldu yortulu bir sıra, angısında pay aldılar üüredicilär hem üürencilär, bu kuruluşun veterannarı, gimnaziyayı başaran insannar, gimnaziyanın o günkü musaafirleri.
Baurçu küüyün gimnaziyasında üüredicileri hem üürenän üürencileri bu kuruluşun 35-ci yıldönümünnän kutlamaa deyni, o günü yortulu sıraya katıldılar Gagauziya Halk Topluşun Baurçu küüyündän deputat Grigoriy KADIN, Gagauziya üüredicilik Upravleniyanın başı Natalya KRİSTEVA, Gagauziya Başkanın işlerinä bakan bölümün başı İvan KOLİOGLU, Baurçu küüyün primarı Sergey TUKAN, küüyün popazı hem taa çok insannar.
Yortulu sırada kutlama, selämnama hem şükürlär nasaatınnan insannara danıştı Baurçu gimnaziyasının direktoru Galina PAMUCAK. Canabisi urguladı, ani gimnaziya yıl-yıldan Gagauziyanın en islää üüredicilik kuruluşları arasında er alêr hem onu büünkü günädän 4700 kişidän zeedä başardı.
Kutlama sırasında, çok yıllarda ii neetli zaametleri hem dä üüredicilik uurunda verimni katkıları için, gimnaziyanın pedagogları ödüllendi: Gagauziyanın “Zaamet şanı” medalisi verildi gimnaziyanın direktoruna Galina PAMUCAKa; ginaziyanın direktorunun üüredicilik hem terbiedicilik uurunda yardımcısına hem rus dili hem literaturası üürediciykasına Marina YALANCIya hem dä matematikada üürediciykaya Praskovya KRİSTEVAya verildi Şannı ad “Gagauziyanın kıymetli pedagogu”; bir sıra üürediciyä verildi Gagauziya üüredicilik Upravleniyasının Gramotaları; “Gagauz dilin kullanma alanını genişletmäk” programası çerçevesindä, lingvistika dışı disțiplinalarda üüretmektä gagauz dilini kullanmak için, 13 üüredici kabletti Gagauziya üüredicilik Upravleniyasının Diplomnarını hem 3000-4500 arası para ödülerini.
Gagauziya Halk Topluşun deputatı Grigoriy KADIN verdi gimnaziyanın medițina zaametçiykasına hem kimi üüredicilerä Gagauziya Halk Topluşun hem Gagauziya İspolkomun gramotalarını.
Büünkü gündä Baurçu küüyün gimnaziyasında işleer 38 üüredici, angıları bilgilerini hem zaametlerini vererlär 400-dän zeedä üürenciyä.
